西班牙前鋒費蘭度托利斯喺上個禮拜五透過社交網宣佈退役，翌日日職「王子」喺鳥棲砂岩作客1:3輸畀北海道札幌岡薩多嘅比賽齋坐冷板凳冇落場，唔通佢嘅告別戰就咁無聲無息上演咗？王子迷可以放心，禮拜日早上費托喺東京召開記招正式宣佈退役，席間表示8月23日鳥棲主場迎戰神戶勝利船先係佢嘅告別戰，屆時有機會會對番佢同胞「小白」恩尼斯達同韋拿，球迷要親眼見證王子告別，仲有時間諗計撲飛同買機票。
禮拜六日記者會開始前，會場首先播出介紹費托球員生涯嘅短片，其後呢位即將結束18年球員生涯嘅前西班牙國腳就開始再確定決定退役同講感受，透露佢嘅職業生涯告別戰定喺8月23日，當日係禮拜五只有一場日職上演，就係費托效力嘅鳥棲砂岩主場迎戰神戶勝利船。
掛靴因身體狀態下滑
場波唔係球季煞科，但對費托嚟講都有一定意義，因為對手陣中有昔日一齊喺西班牙並肩作戰嘅恩尼斯達同埋韋拿。費托話︰「嗰陣我會同我嘅老友恩尼斯達仲有韋拿對壘，呢個係我好難想像到嘅對決，一次象徵性嘅時刻，完美嘅時刻。」鳥棲喺上個禮拜六日職又輸繼續包尾，但勝利船其實都唔好得幾多，目前只係多鳥棲五分，希望到8.23唔會係費托告別戰兼護級大戰。
費托1年前加盟鳥棲同球會簽約2年，但佢一直表現一般，今季仲未開齋，所以決定提早結束球員生涯︰「我聽到我身體嘅聲音，我已經唔似以前咁去享受比賽，所以最誠實嘅做法就係選擇到此為止，我要問心無愧咁結束足球生涯。」費托強調掛靴嘅決定完全係基於自己身體狀態，無論鳥棲現時包尾定排榜首都一樣。
續留日本做鳥棲顧問
雖然告別職業生涯，但費托未來仍然會留喺球圈，仲會以唔同方式繼續喺日本：「退役後我會留喺鳥棲做顧問，幫球隊改進。我會集中喺青少年球員發展方面，球會青訓學院有唔少出色嘅球員，我哋將會令到球隊變得更加強大。」