黃心穎今年4月被爆偷食人夫許志安，形象插水，要即時停工，復工無期，而佢一早拍好嘅四部無綫劇集《堅離地愛堅離地》、《丫鬟大聯盟》、《牛下女高音》同《法證先鋒IV》都受牽連，《堅離地》被抽起播出無期，《法證先鋒IV》要重拍，不過據知無綫上周五開會之後，已決定《牛下女高音》唔會重拍，心穎有得留低，祈望安心事件丟淡後，可以安排原裝版本播出。
「有啲景冇咗」
有份主演《牛下》嘅鍾景輝（King Sir），噚日接受傳媒訪問時直認收過呢個消息，佢話：「聽見少少啦。」問到係咪擔心老人家重拍太辛苦？佢話：「唔係，佢哋好難召集演員時間，同埋有啲地點冇咗，好似大埔嗰個天鵝湖（白鷺湖互動中心），打風後都冇晒啦。」係咪覺得原裝版本出街仲好？佢話：「公司決定，我冇所謂。」而之前有傳會頂替心穎拍《牛下》嘅江嘉敏就話未收到通知。
至於起用湯洛雯頂替心穎重拍嘅《法證先鋒IV》，日前影到湯洛雯着婚紗拍攝，已接近埋尾。據了解，《法證IV》因為係中港合拍劇，有心穎參演根本冇可能過到內地審批，所以即使損失逾千萬都要重拍，否則損失仲大。
撰文：馮仁昭
