林鄭在六月十八日星期二下午四時見記者，向全港市民講句道歉，但不肯講撤回逃犯條例修訂，在記者窮追之下，林鄭一於做人肉錄音機，死都唔肯講撤回，令人失望。其實佢在六月十五日已見過記者一次，當時冇道歉，冇撤回，一位建制派消息人士對明報講：「林鄭說法衰到冇人有（李先知專欄，六月十七日）」，到咗六月十八日，晨早睇大公報，見大公報社評疑似是先知，講到：「特區行政會議今日休會，特首林鄭月娥會見傳媒，估計將會就明確撤回修訂移交條例有所宣佈，並將會就事件向市民正式道歉。」
之後又有一句：「特首今日將會宣佈正式撤回條例草案及再度作出誠摯道歉，這是一種非常謙卑和認真的處事態度，顯示的是為政者應有的道德勇氣和責任承擔，值得給予理解和支持。」
嗱，大公報喎，唔係蘋果日報。大公文匯等黨報直接受中聯辦統轄，社評一句一字都要推敲，不能違背中聯辦意思，或錯誤報導中聯辦不認可的事實。故此睇完大公報社評後，左丁山懶醒咁對幾位老友講：「林鄭今日宣佈撤回條例，認真道歉！」點知大公報放錯料，林鄭硬是不肯宣佈「撤回」，只係不停講「暫緩」，點解大公報會出錯呢？還是林鄭不聽中央命令，自把自為，只肯「暫緩」，不肯「撤回」？又或者，大公報出咗街後，六月十八日早上至下午四時前，中聯辦與林鄭角力，而林鄭竟然贏了？
無論如何，呢段插曲顯示，中聯辦對撤回不會反對，只是林鄭強悍，誓不低頭，於是令到建制派議員非常氣頂，驚住畀泛民議員有藉口，在今年區選及明年立法會選舉猛烈圍攻，令建制派招架不易。
二百萬人上街，未必等於二百萬選民，也不等於凡上街的選民又必然全部投票畀泛民，還要看泛民政綱之經濟政策而定。中產選民喜歡泛民爭取民主，但不認同泛民之左傾赤化香港之經濟政策，中產既要民主，又要搵食養家供仔女讀書，對泛民搞福利主義，甚有疏離感。在功能組別，建制議員反而最驚，例如謝偉銓，陳健波等面對界別內的年青專業人士並無取勝把握，林鄭今年至今不集中精力解決兩大民生困難，即房屋土地與醫療人員短缺，反而浪費全部政治資本於「逃犯條例」，得罪全世界，枉稱好打得！