港府、建制派喺反送中惡法呢一役輸晒民意，喺輿論陣地完全陷於捱打狀態，於是唔少親北京喉舌開始要製造輿論，連造假亦在所不計。
好似盛傳背後係左報支持嘅facebook專頁「點新聞」，星期五出咗一個叫「暴徒圍毆警員片曝光 《毒果》急刪片」嘅po，話《蘋果》發咗一條6.12示威片，片入面有示威人士打警員，「不過隨即秒刪，顯然係想想隱瞞真相」。呢個po出咗之後，有人發現條片根本冇刪，亦唔係6.12當日嘅片，facebook專頁「求驗傳媒」仲踢爆，其實條片係6月9日示威片，恥笑點新聞「偷片換日...期」，而有關片段一直喺《蘋果》網站，亦冇任何證據證明《蘋果》刪過片，批評「點新聞再一次愧對『新聞』兩字」。
《蘋果》發出嚴正聲明反駁點新聞抹黑：「近日網上流傳，指《蘋果動新聞》把6月10日凌晨，在立法會示威區發生的警方與市民衝突影片刪去『以隱瞞真相』，有關影片顯示警員與市民拉扯後倒地糾纏，《蘋果》沒有刪去該新聞，有關片段仍可在網上閱覽，《蘋果》會循法律途徑追究，特此澄清。」