有游BB之稱嘅青年新政游蕙禎，先唔講佢因為樣貌標致被網民封為女神，佢2016年因為宣誓風波被褫奪立法會議席，中央當時仲釋過法，咁大件事噃，相信冇乜理由唔認得游BB個樣啩，但民建聯東區區議員植潔鈴竟然「唔認得」，仲用咗游BB張相做Telegram頭像。
游︰恐街坊誤會入咗本土派
點解有自己相唔用？確實好可疑，尤其Telegram最近喺去大台化嘅反送中示威活動中，被示威者用嚟互通消息，所以游BB都喺facebook公開事件，提醒用Telegram嘅人，記得要提防呢類盜用他人頭像然後加入情報群組嘅人，仲寸埋「克警」，形容「警員唔show委任證，議員唔show自己樣」，實在係5,000年兵法最高境界。
游BB仲一併上載同植潔鈴嘅電話對話，質問對方做乜用佢張相？植潔鈴似有備而戰，話自己透過app嘅web search功能搵到張相：「見到……啊！都幾靚女咪用咗」有朋友提醒佢，先如夢初醒要換相喎。佢仲反問游BB，呢個係佢私人號碼，點解游BB會發現到？查實web search功能必須打關鍵詞先會出結果，八方試過打「靚女」、「港女」都搵唔到游BB嘅相，要打「本土派」同「游蕙禎」先至搵到，唔知植潔鈴又用咩關鍵詞，搵到游BB呢張靚相呢？
八方問過游BB，佢話偷嘢真係唔啱嘅，尤其冇問過人就攞人啲嘢亂咁用；對於植潔鈴一度話唔太認得個樣係佢，游BB直言有啲擔心對方：「作為政治人，應該認識身邊唔同立場人士嘅樣啩！」又話自己打去理論都係費事對方、甚至民建聯「好大鑊」，「如果民建聯啲fans、啲街坊誤會咗佢（植）入咗本土派，咁就唔好啦。」
李八方
