山神歸位！智利上星期五喺美洲國家盃C組次輪分組賽，前鋒阿歷斯山齊士下半場「窩利」射入奠勝，幫智利2:1贏最後10人應戰嘅厄瓜多爾，兩戰全勝提早出線。山神喺美洲盃2場入2球，等於剛季喺曼聯各賽事踢27場嘅入球量，究竟問題出喺山神定係曼聯度呢？
15、16年連贏兩屆美洲盃嘅智利，今屆繼續以一班老臣子出戰，作為國家隊歷來嘅「喼帽王」同入球王，就算佢過去一季半喺曼聯過得一塌糊塗，又越嚟越多傷患都好，返到智利都即刻變番必然正選。今場智利八分鐘就開紀錄，智利角球攻勢被解圍，球隊中場富恩沙利達喺禁區邊起腳彈柱入網。厄瓜多爾喺26分鐘由安拿華倫西亞射入12碼追平。51分鐘輪到山神出場，艾蘭古斯右路傳中，遠柱嘅山齊士球不着地，第一時間右腳「窩利」抽遠柱射入。完場前一分鐘，厄瓜多爾有中堅阿基利亞領紅被逐，不過都冇乜影響。
扭傷腳都有貨交
智利兩戰全勝排C組榜首，提前一輪晉級八強，尾輪鬥烏拉圭變咗名次之爭，而厄瓜多爾最後一輪鬥日本，如果贏波都仲有望成為2支最佳小組第3名之一，仲可以出到線。山神繼上場智利4:0炒日本交出1球1助攻後，今場又入一粒，2場波已經等如佢上季喺曼聯各賽事上陣27場嘅總入球量。30歲嘅山神仲爆料話自己上半場扭傷腳踝，但堅持紮住繃帶同啪止痛藥再上場。智利教練路達就話山神喺曼聯俾隊友排擠先踢到咁差：「佢喺國家隊好有動力，可能呢啲嘢佢喺曼聯得唔到，佢歸隊時處於好困難狀態。」
高人工令紅魔不穩
山神上年一月由阿仙奴加盟曼聯，據報有50萬鎊周薪係英超最高，比佢班曼聯隊友高一大截，有傳搞到保羅普巴、迪基亞都想人工拍住山神，亦成為曼聯近年半爆出內部不穩消息嘅原因。