政治現實殘酷到極，林鄭月娥一生精靈，人生最大敗仗係在六月九日香港有一百萬人上街遊行之後，猶不覺悟，在六月十日見記者時堅持於六月十二日將逃犯條例修訂案提交立法會二讀，引致市民在六月十二日包圍立法會，釀成警民衝突，令立法會開會不成，但林鄭仍然堅持不收回條例，六月十五日下午見記者，繼續口硬，不肯撤回，只允「暫緩」，市民一路睇電視一路罵聲四起，於是六月十六日有二百萬人上街。
有27%人口上街反對政府，在任何地方（中國北韓古巴除外），政府都會垮台、重組，或重新舉行大選。但香港政制畸形，行政長官大晒，只有北京可以指示佢心痛腳痛而下台，林鄭目前似乎仍然得北京信任，可以做落去。之不過咁，林鄭母校校友竟然在蘋果刊登廣告，大字標題：「同為校友，以你為恥」，認真係奇恥大辱，唔知佢可唔可以發動嘉諾撒聖方濟各書院校友中之「藍絲」在文匯大公登廣告撐佢呢？
人雖然留在禮賓府，林鄭已威信大失陷入捱打格，此則令左丁山想起傳媒大哥趙應春月前獲恒生大學頒授榮譽院士，佢代表其他院士致謝辭，其中講到：「我哋幾位在所屬機構都曾掌握大權，可決定員工命運，但權力不可永久，我哋需要權威先至可以令人尊重敬佩，心悅誠服，權力係更高層給予的，權威係自己掙回來的。」（大意如此，非原文）
趙大哥講得好，正是面係人家畀，架係自己丟，林鄭身為特區之首，以為掌握莫大權力，可以決定香港人自由有幾多，實在狂妄。當然，行政會議班大哥大姐亦有責任，佢哋有冇體察世界大勢，本港市民反應及情緒，盡力勸諫林鄭唔好強行推動修例呢？行政會議討論事情樣樣保密，外人好難知得清楚，但林鄭變成落水狗之後，好多建制派忽然大膽，說話或明或暗諷刺林鄭，可能令呢位成世考第一，事事一帆風順嘅特首，第一次感覺到世界上有人情冷暖這回事。現在乜都有人傳，例如麥美娟爆粗鬧佢，行政會議曾有兩位最高官勸特首終止修訂逃犯條例，畀阿姐拍枱教訓半小時，其他人當然收口，諸如此類，還有，特首閉門見六大宗教領袖，係訓話多過解釋喎。一個人性格咁強硬，點會自動下台吖！