梁家傑:講畀鄭若驊聽

梁家傑:講畀鄭若驊聽

【本報訊】終審法院首席法官馬道立在昨日的演辭中表示,在法治受到不公平的批評和受損時,法律界的領導者有責任挺身而出。資深大律師梁家傑認為,政府強推的《逃犯條例》修訂正正就是馬道立所講法治受嚴重損害的例子,「(修訂)將法官擺上枱,呢個傷害夠唔夠大?3,000個法律界(人士)出嚟遊行、12個大律師公會歷任主席發聲明、3個高級法官接受路透社訪問。呢個(修訂)正正係『駱駝背上最後一根稻草』」。

梁家傑認為,近年香港法治受損的例子還有更多,「你DQ議員,用人大釋法嚟壓法院;告佔中九子,用澳洲宣判違憲嘅控罪(煽惑他人煽惑公眾妨擾);七警、朱經緯案,李偲嫣之流啲人出嚟鬧法官」。

斥對法治受損默不作聲

但他指出律政司司長對以上眾多事件都默不作聲,認為馬道立昨日發言的對象正正是身在現場的鄭若驊,「佢係法律界、大律師界嘅senior嚟㗎嘛,我覺得馬道立係意有所指,係講畀佢聽」。

中文大學政治與行政學系高級講師蔡子強認為,在過去數月法律界的挺身而出對今次反惡法運動十分重要,「畀咗市民一個好強烈嘅訊息,政府今次嘅倉卒立法,連法律專業都覺得好有問題。部份民眾未必好了解法律條文,但佢哋相信3,000個法律界(人士)走出嚟,唔會隨便將成個法律界壓上去,企出嚟一定係好關鍵」。

據商台報道,行政長官林鄭月娥昨在禮賓府與司局長舉行集思會,討論如何令政府施政更貼近民意以及切合市民需要,所有政府主要官員都有出席。集思會長達五小時,與會司局長到晚上七時許乘坐座駕離開禮賓府。

■記者關冠麒