黃翊自己也估不到，兩年前一個電話邀約，然後戰戰兢兢在《流行經典50強》演唱，令一個消失了20多年的歌手再次「復活」。兩年下來，唱片出了，開埋個人演唱會，最近和初戀情人黃寶欣拍了新歌《A Second Chance》MV，9月再聯同「經典同學會」九位同學在伊館開騷。
51歲的黃翊說，有時候越想得到的，偏偏空手而回，「好得意㗎，往往你越係有呢啲咁嘅奢望呀，往往都係唔得嘅！但係𠵱家你睇吓幾得意，我完全唔諗，啲嘢就突然間走晒埋嚟……」
一個《流行經典50年》，翻生了不知多少個消失了的名字，黃翊說這兩年間「叫做踏返隻腳入樂壇」，以往沒有聯絡的所謂娛樂圈朋友，又紛紛蒲頭了。
去年自資推出的《A Second Chance》唱片，真箇碟名如人生。如今再戰第二人生，但早已沾手飲食業的黃翊也不忘新搞作，除了大排檔生意，最近還開了冰室。
唱歌與飲食，那樣是本業、那樣是副業，怎算得清？
撰文：文嘉龍
攝影：沈健程
真係唔記得咗我
由《流行經典50強》到《流行經典50年》唱足兩年多，終於都鳴金收兵，決定做到下月中收檔。節目冚旗，但那些好歌手一樣馬照跑舞照跳，像黃翊，9月將會孖住「經典同學會」九男女，齊齊在伊館開金曲騷。
回想兩年前第一次上《流行經典50強》，黃翊百感交集。「我心諗終於都搵我喇，頂你吖！嗰時心情好複雜，又開心但係又有啲嬲！」
開心係終於有人搵上門，唔開心係咁遲先有人搵，「講真一定唔開心啦，其實喺嗰個年代我算係唔錯可以彈起嘅人，我除咗唱歌仲有拍劇、做電視音樂主持，其實都幾多瓣數，我心諗做咗咁多嘢，點解咁得意嘅，我計番我身邊嘅人比我更加少嘢（做），但係反而搵番佢哋出嚟，咁我個心好似有啲唔舒服囉，同埋覺得真係唔記得咗我喇，當然會唔開心啦！」
黃翊不會忘記，那一夜的「復出」是如此難忘，他說送了十多張飛給朋友到大台捧場，他的朋友對他說，錄影當刻介紹黃翊，現場的觀眾問「邊個黃翊？」，「我朋友話一出嚟介紹黃翊，啲人話黃翊？邊個黃翊呀？好似好熟咁樣，到隻歌intro開始起，啲人話，咦，好熟喎，跟住我唱，啲人話，哎吔，我記得喇，佢係黃翊呀！全個台好靜，係好靜咁聽我去唱《最愛的你》呢隻歌，我覺得嗰一刻我完全俘虜晒佢哋，我諗番我廿幾三十年唱歌都吸引唔到嗰班人，但嗰次好奇怪喎，佢哋直頭投入晒我隻歌，反應好似炸冧咗成個一廠咁！」
黃翊出道的「嗰個年代」是八十年代尾，那時候四大天王還未出現，黃翊被唱片公司捧為「張國榮接班人」，之後和初戀情人黃寶欣因拍劇撻着，令當時下禁愛令的唱片公司下旨雪藏，從此黃翊在娛樂圈淡出。
「我覺得當時我公司亦做得唔好，唔應該咁樣去威逼我做呢樣嘢（逼分手），應該要循循善誘咁同我去講！變咗我條氣就唔順，跟住我就去傾其他公司（打算離巢），咁唱片公司（新藝寶）知道喇，就畀咗份約要我即刻簽咗佢，我一望，要我又簽多三年呀？我心諗之前份約係有錢畀我，有advance畀我，但公司呢次講唔得，斗零都唔畀，要我即刻簽咗佢，我一望咁唔合理梗係唔簽啦！我唔簽咪雪我囉，就係咁樣！你雪我，我梗係唔驚你啦，當時我自己喺樂壇算走得唔錯，咁我對自己好有信心，你雪我、唔幫我出唱片，我可以做其他嘢，但係我低估咗唱片公司嘅威力，佢哋有方法令你做唔到！」
覺得已經冇晒尊嚴
雪藏的日子不好過，更無奈是新人一個接一個，好易俾人淘汰。黃翊說：「嗰個年代有好多新人表現都係好勁抽，一浪一浪係咁冚埋嚟，就咁就冚死咗喇！」
香港市場容不下自己，黃翊說自己試過周圍向其他唱片公司敲門，結果希望越大失望越大。「你知唔知我有黃翊嘅CD七、八套㗎，我寄晒自己嘅資料呀履歷呀一份一份咁，但係全部都石沉大海，全部都冇回覆，慢慢個心就真係死。」
為了生計，還好可以去內地登台，「咁我都要生活㗎，去內地做一啲登台演出，叫做維持到生活。我有樣好就係我有儲蓄習慣，有好多人搵到就使晒佢，我不嬲唔係呢啲人，我算好彩囉！我若干年後撞番我唱片公司老細，佢話黃翊我話畀你聽啦，你捱得到今日全因為你夠孤寒！我唔係一個點使錢嘅人，有得畀我慢慢搣，畀我過啲難關！」
不過登台都要講知名度，當越來越少在螢光幕現身，黃翊不止登台機會變少，更現實是連酬勞都逐級降。「去內地唱歌你點都要有啲知名度，唔係就會慢慢咁淡忘你，我係男仔更加唔着數，女仔着條裙仔着得靚靚都可以，你係一個麻甩仔上去，唱得好又點呀，一路唱到啲人慢慢淡忘你呢，你嘅歌酬就會縮到越來越少，跌到已經得番十分一咁滯，當你去到嗰個位，我覺得已經係冇晒尊嚴，因為唱歌係我最耍家嘅一樣嘢，但係原來我唱歌唔值錢喎，跟住我就覺得已經冇彎轉喇！」
上天關了一道門，總會打開另一扇窗。黃翊之後叠埋心水與當時的亞視藝員女友、即現在的太太陳存正（兩人在登台時相識），兩人在黃金海岸的周末跳蚤市場擺檔賣衫，一賣賣足七年，他說：「呢七年其實都幾辛苦，因為喺黃金海岸個outdoor地方，熱天就熱死，冬天就一個北風刮埋嚟就凍到你呢，有時真係搵到啲錢都唔夠你睇醫生。」
擺檔的最後兩年，黃翊同步和胞姊在大埔墟街市熟食中心開了大排檔，得街坊支持漸漸做出好成績，黃翊正式全副心機放在飲食事業。
太太換咗腎康復中
兩年前重出江湖，忽然間有好多「朋友」出現番。「我由冇唱歌呢二十幾年，其實一路都冇乜咩朋友特別會主動再搵我，因為實在真係唔記得咗我，但係自從兩年前我彈番出嚟，又叫做行得條路都幾好，咁真係多番好多好多好多，以前冇搵我嘅人全部浮番晒出嚟搵我，當然佢哋唔係話要叨我光，只不過係話，阿翊走番出嚟喎，問候吓我呀，亦有好多朋友會畀啲意見，會有好多呢啲朋友出現番囉！咁你話係咪叫好現實呢？我諗可能係有少少嘅！」
黃翊說如今總算為自己出番啖氣。「冇緊要嘅，有時候朋友呢，係要分開好多唔同層次嘅朋友㗎，唔係話個個都要係好朋友，有啲朋友係深交，可以傾心事嘅；但係有啲朋友係飲飲食食嘅，嘻嘻哈哈幾句嘅箒，我諗每一個人都會有啲咁嘅朋友囉！」
除了為自己出番啖氣，另一個重要原因是為了向家中的兒子證明自己，「我個仔今年就嚟14歲啦，由佢懂性就知個老竇係做大排檔，喺個檔度成日好大聲講嘢，又鬧呢個又鬧嗰個好惡咁樣，佢唔會有機會認識另一面嘅爸爸係點，所以想證明畀我個仔睇，喂，你爹哋都幾勁㗎喎！好彩都證明到。」
去年10月終於舉行首個演唱會，黃翊說當開場曲的音樂響起，他在後台步出台前那二十步期間，腦海中由這兩年在《流行經典50強》發生的一切開始，一幕幕快速搜畫出現。他更開心的是囝囝在台下捧足全場，「佢真係乖乖坐定定，唔打機一路睇住爸爸三個鐘頭演出，佢話爹哋你今次做得好好呀，嗰種開心係我好滿足嘅，終於個仔都知道老竇有啲料到喎！」
美中不足卻是開騷當晚，太太因腎病復發而在醫院昏迷，未能到場支持。黃翊今天說，太太已換腎正在康復中。「佢𠵱家換咗腎，康復當中，要一路食住抗排斥藥，始終個腎唔係自己，要一路食住抗排斥藥。唔係話換咗個腎就一天都光晒，唔係咁簡單㗎，你要逐步逐步咁去幫番個身體，係好漫長嘅康復程序開始緊，但係比之前好咗啲。」
黃翊說：「我個人比較樂觀，佢（太太）已經唔係第一日病，已經病咗好多年㗎喇，所以我已經好似預知咗一啲事喺心裏面咁樣，變咗唔會令到自己好緊張同好擔心囉！有病冇人想嘅，有能力咪去醫囉，同佢傾吓偈，畀多啲正能量佢，其實𠵱家OK啦！」
【後記】大埔之友
訪問在黃翊的新冰室進行，只開了兩個多星期，黃翊趁訪問空檔就招呼現場午市的食客。冰室開在大埔錦石新村，同大埔墟的大排檔一樣專攻街坊生意，由大排檔到開冰室，黃翊都同胞姊拍住上。
「眨下眼都做咗十三、四年㗎喇，都算托賴，唔可以話做得好好，但係都OK嘅，𠵱家又搞埋冰室，開拓吓唔同市場啦！」
做街坊生意，採訪當日就遇上曹永廉帶住剛放學的仔女，一行三人到黃翊的冰室食飯，黃翊說：「大家都係大埔友！」曹永廉臨走時到櫃面畀錢之際，黃翊就叫「唔使唔使」，曹永廉說：「佢點都唔肯畀我埋單呀！」大埔之友，又係《流行經典》班底，一餐晏仔，無計啦！
場地提供：105冰室
