二百萬人遊行之日，左丁山在馬場問一位與行政會議成員有偈傾嘅馬主：「林鄭呢次咁失威，政治資本算唔算一鋪清袋。」馬主笑笑口：「在馬場就講馬啦，講政治失感情，呢度廂房有藍絲、有黃絲，無謂搞分裂。」左丁山話：「自第一二場大熱門贏馬之後，連場爆冷，連富二代馬主（黃永龍）嘅『勞動創造』都可以爆62倍大冷門，我地輸到暈，講馬邊度有心機喎。」馬主於是細細聲答：「我聽到消息人士話，林鄭在深圳拜見韓正，閂埋門傾，內容只有幾個人知，但知道林鄭見完就面似玄壇咁返香港。」上星期六（15號）林鄭就宣佈暫緩「逃犯條例」修訂案，但為咗面子，點都唔肯講撤回。暫緩就是雖然實則上係撤回，但技術上有極大靈活性。如中央發覺有需要，就隨時可以捲土重來。
中央梗係唔肯講實啦，點都要保留主動權，不過陳智思與任志剛兩位林鄭大顧問都講暫緩等於撤回，大家咪就一齊掩耳盜鈴囉。當日馬主加多一句：「林鄭不止一鋪清袋，而且負債纍纍。」甚麼債，政治債也。
正是一子錯，滿盤皆落索，林鄭自言撼頭埋牆，患上左傾盲動症，以為會幫國家立功，着實低估咗香港人渴求自由，不欲受北京規控的意志。
呢日跑馬輸到貼地，賽馬完畢就到凱旋廳晚飯，又見到另一位馬主S，打過招呼，馬主S講：「今日（16號）好似遊行人士仲多過上星期日，可能係受到林鄭在昨日嘅一番言語刺激之故，如果當日佢宣佈撤回及講句Sorry，今日邊會有咁多人上街呀！」馬主S個仔搶住講：「係呀，昨日林鄭一路講，我班同學在fb一路表示不滿，叫大家一齊去維園，我本來係去遊行嘅，阿爸唔畀，捉咗我嚟馬場啫！」馬主S亦夠苦心，大概驚住個仔「受外國勢力煽動」之故。目前建制派之最大心魔就係外國勢力搗亂，連大教授、讀書好叻嘅劉兆佳教授都係咁講，可見得「外國勢力」概念已是建制派內深入人心嘅大敵人，已到咗不能問，只要信呢個階段。正因為咁，佢地就缺乏思維去分析為何三十歲以下香港人幾乎九成九反共厭共恐共，左丁山一代大學生，起碼有五六成係相信共產主義救中國嘅啫。殖民地時代學生傾向中共，回歸後，學生傾向反共，唔怪得林鄭在15號記招上講到：「唔知點解，我地嘅解釋冇乜效力。」又有報導，林鄭在禮賓府見教育界及教會代表時講到政府好有心機教育青年，但今次走在最前綫反對佢嘅就係年青人，於是有感而發，流出眼淚！
其實有乜好喊吖，建制派及政府日日講外國勢力搗亂，從不思考年青人如何愛自由，梗係輸幾條街！