曼聯中場連格唔單只喺球場嘅表現有啲令人不滿，就連喺場外嘅生活都令領隊蘇斯克查（蘇B）覺得好唔妥，甚至警告佢要注意自己喺社交媒體嘅行為。話說喺休季期間，呢位26歲紅魔中場連埋隊友拉舒福特，同埋友人去咗美國邁阿密度假，喺準備離開酒店嘅時候，連格喺間好大嘅酒店房用Snapchat拍片影自己啲朋友，期間佢仲不斷爆粗，其中一間房嘅同行朋友見到鏡頭，仲喺床上面做出性行為嘅動作，雖然唔係真做，但有指曼聯領隊蘇斯克查睇完條片之後非常不滿，外界預料蘇B喺7月1號季前集訓之前，會同連格傾傾件事照吓肺，連格會有咩後果就暫時冇人知。
另外，曼聯仲有啲唔多妥新聞傳出，ESPN引述消息人士報道，領隊蘇斯克查今夏只有1億鎊（約9.93億港元）資金增兵，至於會唔會有其他額外嘅資金，就要視乎呢位嚟自挪威嘅主帥，有冇諗住賣球員嚟套現喇。