英格蘭女足周三喺女子世界盃D組最後一輪分組賽，以2:0贏咗日本，3戰全勝後以首名晉級16強；不過隔籬嘅蘇格蘭就慘喇，佢哋對阿根廷女足一度領先3:0，但最終被逼和3:3，排小組包尾無緣出線。英格蘭女足主帥菲臘尼維利今仗冒險喺正選陣容做咗八個變動，結果重返正選嘅英格蘭前鋒艾倫韋芝喺14同84分鐘建功，幫球隊贏2:0完場。英格蘭除咗一報四年前喺女世盃準決賽被日本淘汰嘅仇，仲順利以小組首名晉級16強。
呢邊英格蘭上天堂，另一邊蘇格蘭就慘跌落地獄，佢哋喺同組另一場對阿根廷女足，喺完場前17分鐘仍然領先3:0，點知最後被對方逼和3:3，賽後喺D組排包尾無緣出線。今場阿根廷補時扳平嗰球12碼就惹嚟爭議，當時蘇格蘭門將阿歷山大曾經撲出對方射門，但球證睇完VAR指佢離開白界在先要重射，結果佢第二次就救唔到，最終蘇格蘭只能和波出局。