香港200萬港人上街反送中惡法引起全球關注，香港秩序井然、和平嘅遊行，幾乎霸佔全球所有主流媒體封面或頭條，但估唔到今次香港人上街，連外國兒童雜誌都關心！
The Week Junior係英國一本畀兒童同少年睇嘅雜誌，今期佢哋就用香港200萬人上街做封面，林鄭月娥同港府唔止「揚名」國際，仲連外國細路仔同青少年都知到香港政府點將港人送中，搞到官逼民反！
德領事館借古諷港
講到外國勢力，又點少得成日喺fb抽港府水嘅德國駐港總領事館！今個星期日香港200萬港人上街反送中惡法後，前日佢哋喺fb出po，話66年前嘅6月17日，東德各大城鎮有差不多100萬人示威遊行，要求實施自由選舉同埋統一兩德，呢場抗爭遭當時蘇共以坦克鎮壓，估計有多達50人喪生，而為咗紀念六一七事件，西德政府自1953年開始到東西德統一，將每年6月17日定為國慶節，直到1990年先再將「德國統一日」改定於10月3日。正當香港人同樣以上街抵抗中共打壓，呢個po對香港人嚟講特別有深意。
李八方