接受腦瘤手術後一直向立法會告假嘅公民黨議員陳淑莊，噚日終於復工！噚日佢身穿繫上白色絲帶嘅黑色連身裙、撐住枴杖，一早現身立會開會，其間黨魁楊岳橋一度上前扶住佢，好多民主派議員見到Tanya重返會議廳都表現興奮，李國麟、范國威、毛孟靜都上前同佢擁抱，毛孟靜仲特別用手機拍下Tanya頭部疤痕。
至於建制派議員反應冷漠，只有經民聯主席盧偉國一度上前問候，同場嘅保安局局長李家超就面如死灰，只坐喺自己位。Tanya手術後戰鬥力唔弱，噚日緊急質詢時係咁問李家超會唔會辭職問責，八方見Tanya康復得咁好，相信好快可以同民主派戰友拍住上追擊林鄭。