忠誠何價？又到咗夏天轉會窗開啟，唔少球員都會為前途打算，有啲球員甚至會同球會反面，達到轉會嘅目的。最近曼聯中場保羅普巴，就喺日本出席活動時自爆想接受新挑戰，對曼聯全無尊重可言！但最諷刺嘅係，鬧轉會嘅普巴合約上講明，如果普巴7月1號仲係紅魔一員，就可以拎到378萬鎊（約3,700萬港元）嘅忠誠金，分分鐘普巴拎完錢就會走人！忠誠？似乎已經喺球壇上慢慢消失。
祖記出價12億𠱁回巢
雖然普巴上季喺曼聯搞到滿城風雨，但佢始終都係紅魔數據最好、最能夠孭飛嘅球星，甚至有傳領隊蘇斯克查，仍然希望以普巴為球隊核心，點知呢位法國球星知道自己仲有價有市，一個屈尾十就自爆話要接受新挑戰，相信曼聯已經非常頭痕。呢個時候有英媒仲爆料話，普巴合約入面存在住一個叫做忠誠獎金嘅條款，只要普巴每效力滿曼聯一季，獎金就會逐年提升！
其實曼聯當初設立呢個條款嘅目的，明顯係想鼓勵普巴專心留喺曼聯，越踢得多季獎金就越多，話說上季已經拎到346萬鎊嘅普巴，目前就算鬧離隊，只要佢喺7月1號仲係曼聯球員，根據合約就會拎到今季加碼嘅378萬鎊獎金，所以普巴就算想轉會，好大機會會等埋7月1日，拎埋錢先至走，可憐曼聯到時好大可能人財兩失！
雖然目前普巴係皇家馬德里教練嘅頭號目標，但銀河艦隊今季買咗夏薩特、盧卡祖域、費蘭特文迪等人，加埋原本賓施馬、莫迪歷、沙治奧拉莫斯等球星，薪酬空間已經唔多，所以早前傳出皇馬要求普巴減薪加盟，但據報普巴就唔想減人工，有傳佢嘅前球會祖雲達斯，仲準備報價1.4億歐元（約12億港元）希望普巴回巢，誓要同皇馬拗手瓜。
新尼馬登艦拍夏薩特
雖然普巴去唔去到皇馬就仲未知，但皇馬禮拜二又有新人亮相，講緊嘅係舊年已經用咗4,500萬歐元買定，被外界喻為「新尼馬」嘅18歲巴甲山度士翼鋒洛迪高高斯，不過佢接受傳媒訪問時就話：「呢個世上得一個尼馬，我要做皇馬嘅洛迪高高斯！尼馬係另一間球會嘅球員，我唔想講咁多，我好開心可以同夏薩特、賓施馬呢啲球星一齊踢波，雖然我同教練施丹未傾過偈，但我都好興奮可以喺佢手下踢波，雲尼斯奧斯祖尼亞已經話過我知，年輕球員喺皇馬要有耐性。」
