瑪達進入新里程！巴西女足周二晚喺女子世界盃C組最後一輪分組賽，憑巴西女球王瑪達嘅12碼，1:0小勝意大利，全取三分後，以其中一支小組最佳第三名球隊身份，踢入16強淘汰賽。巴西上場以2:3反負澳洲，今仗面對賽前兩戰全勝嘅意大利女足，喺上半場未能撕破對方防線。全場唯一入球喺完場前16分鐘出現，當時巴西得到一球12碼，極刑由瑪達負責操刀，佢射入自己職業生涯喺女子世盃嘅第17個入球，令到佢比男子足壇德國名將高路斯多入一球，成為男、女子足壇世盃史上入球最多嘅球員。同組另一場，澳洲憑前鋒森卡爾個人獨取四球，以4:1大勝牙買加。C組完成全部分組賽後，意大利、澳洲同巴西都有六分喺手，意大利以較佳得失球差力壓澳洲首名出線，巴西就只能以其中最佳第三名身份晉級，將會喺16強遇上法國或德國。