【黑鏡線索】
反送中期間，香港startup士多Ztore其中一位創辦人，喺FB發表撐送中言論，引嚟網民罷買抗議。
有人話，Ztore創辦人應該為失言道歉。但其實係咪失言呢？佢唔係官唔係𢭃大家份糧，佢喺個private post度講佢支持送中嘅理由，就言論本身，冇得話佢係失言，又何來要為失言道歉？
政協老闆撐送中 有違品牌形象
如果係普通市民，話自己睇完其他人反應之後，改變咗立場，收回之前講嘅嘢，咁都講得通。但佢身為政協，無論係真心支持，抑或為歸隊而支持，轉軚都冇說服力，更何況根本冇可能自行離隊轉軚。
所以，個post只係表面，深層次矛盾，係政協身份撐送中，同Ztore嘅形象，本身唔可以並存。即等如，Benetton賣世界大同，吸引佢嗰批顧客，如果實情係個老闆非常種族歧視，咁就好大矛盾，借用行內術語，出現咗founder-market misfit。
當然，一時三刻，只要唔好張揚，未會爆，不過就埋咗個計時炸彈。終於今次出櫃，爆咗。爆係咪一定係壞事？第一，其實咁大嘅矛盾，忍住好辛苦，爆咗未來會比較舒暢。
第二，你又知佢唔係特登引爆？一個可能，係真心信咗個建制民調，發現撐佔中嘅人多好多，不如索性改變定位，去追求更大嘅市場。佢咁轉，係可能流失唔少現有客戶，但同時可能賺返唔少其他客源，或者乘勢殺入商機處處嘅大灣區，我哋睇唔到啫。你覺得佢俾人杯葛慘，可能係表錯情。
顧客方面，自由市場，發現賣家立場不能接受，要杯葛要罷買，係十分正常嘅行為。既然本身係個misfit，分手對雙方都係最文明最理想嘅做法，雙贏。
呢一邊，顧客因送中分手。另一邊，顧客因送中而買多啲，就係蘋果日報。好難想像，黎智英原來咁多年嚟，一路忍住自己嘅真實取態，去遷就取悅追求自由嘅讀者。founder-market fit嘅好處，係既然係真誠，就公開做返自己，好多決定冇咁複雜，而當個時勢造就，例如遇上二百萬人關心嘅大是大非，馬上重鎚出擊。
結果身邊就有唔少朋友，因為睇見蘋果喺反送中嘅表現，而做會員撐蘋果。我估，行會員制嘅決定，早於送中嘅出現，同送中冇關，但機會結果真係留畀有準備嘅人，如果二百萬人上街先拿拿臨籌備會員制，一定會錯過時機。
講返士多，報道話，仲有另外兩個創辦人。暫時冇消息話兩個撐送中，如果佢哋其實唔撐送中，或者唔認同改變公司定位，咁係有啲瀨嘢。問題係，佢哋冇理由唔知政協身份，甚至可能覺得個身份有好處，所以選擇唔理個矛盾，都係嗰句，一時三刻，未必會爆，不過就埋咗個計時炸彈畀自己。
至於員工同事，發咗個割席止血post，話老闆立場唔代表同事立場。當然，對顧客嚟講，係當老闆立場就係官方立場，對員工立場，唔會太關心。同事同創辦人唔同，同事每月出糧，冇拖冇欠，接受唔到立場，可以轉工，受影響創辦人如果要離場，條數難計好多。
撰文：宋漢生