張晉前晚在銅鑼灣出席主演電影《九龍不敗》的首映禮，同片拍檔鄭嘉穎、鄧麗欣（Stephy）、劉心悠、UFC拳王Anderson Silva、陳鈺芸（JuJu）和周國賢等齊齊現身，JuJu更在台上即場示範踢腿功夫。
教拳王表現痛
張晉在今次電影中繼續拳拳到肉，他慶幸沒有斷手斷腳：「其中一場失手頭撞天花板，背脊撻落樓梯，差啲跌斷腰，當時成嚿骨凸咗出嚟，自己睇番片，其實好大機會跌斷條腰，休息咗一個禮拜就繼續拍攝。」對於今次與拳王拍攝，張晉笑言對方是真拳王：「拍戲時打中佢都冇反應，因為佢係職業拳手，習慣咗痛都唔會表現出嚟，但我話唔做反應唔得，一定要畀觀眾睇到先收貨。」
相對張晉打到飛起，Stephy未有機會參與動作演出，她希望接受訓練，將來大展身手，她說：「今次最大動作戲就係追輕鐵。」旁邊的張晉即建議她每天早上5時跟他一起練習。
鄭嘉穎透露現在除了工作時間，全都是陪伴太太和囝囝，他說：「同老婆喺時間上安排，盡量唔會兩個人都唔喺屋企。嚟緊太太生日，會一家離開香港旅行。」他又指基本上現在每齣戲都有動作鏡頭：「同邊個打冇得揀，但當然希望同有經驗嘅演員，因為冇拍過動作戲嘅演員唔識就力，好易受傷。」
採訪：張俊銘
攝影：陳俊強
