亞冠盃16強首回合大戰，日職代表浦和紅鑽喺領先一球下，俾韓職球隊蔚山現代連入兩球反輸1:2，喺自己地頭輸波仲要失兩個作客入球，睇嚟紅鑽次回合想翻身都凍過水囉！紅鑽今仗本來領先，喺上半場37分鐘先憑杉本健勇接應青木拓矢嘅高波傳送，禁區內無人看管下頂入幫主隊領先；點知五分鐘之後，蔚山現代老將李根浩左路傳中，前鋒周敏圭同樣用頭槌遠柱頂入，令兩隊半場踢成1:1。踢到下半場80分鐘，客軍中場黃一秀由半場一路帶波去到禁區頂，都冇紅鑽球員上前攔截佢，結果黃一秀勁射破網，幫蔚山現代作客2:1擊敗浦和紅鑽，出線八強呼聲好高囉！至於上海上港就主場1:1逼和全北汽車。