家吓42歲嘅許世壇，廿零歲就加入世茂房地產，傍住老竇許榮茂打江山，由marketing開始落手落腳做到上副主席及執行董事。今年初公司就畀許世壇多個職銜做總裁，從此老竇就繞埋雙手，用把口指點江山，今年業績會同股東會都交晒畀個囝。
當然前提係阿囝做到嘢喇，噚日光速用咗十分鐘左右就KO咗股東會，去到同傳媒傾計都同樣有效率，答案同問題相符，唔似林鄭講咗幾十分鐘都好似冇重點咁。
好似講到前排啟德百億地王撻定，佢就話香港投地制度有啲唔合理，按金對比地價只係零點幾個百分點，相比起內地投地保證金普遍要地價半成到一成，香港撻定成本真係低好多，覺得要提高到半成或者以上先有阻嚇力。
事實上，記者會有無意義從來唔係取決於時間長短，而係睇台上嗰位有無心答你問題。
李華華
mailto:[email protected]