如果話政壇明燈，好多人會諗起「燒山」蕭若元，但其實除咗燒山之外，政界仲有一個高人，不過佢就只「燈」北京同建制派，仲搞到信佢嘅人雞毛鴨血，呢個就係全國港澳研究會副會長劉兆佳，佢次次話政府冇事、民主派抗爭冇用，但最後變成大大件事。
被建制派當正權威消息人士
有民主派中人同八方講，佳叔係燈完全有迹可尋。2003年仲係中央政策組首席顧問嘅劉兆佳，當時俾人問7.1有幾多人會上街，佢話最多五萬人，呢位民主派人士亦聽聞佢同北京亦係咁講，令北京放心，結果嗰年7.1出咗50萬人上街，殺北京措手不及，亦燈到佢老闆董建華年多後腳痛下台。
不過劉兆佳嘅燈力冇影響佢仕途，到煲呔上場佢繼續做中央政策組首席顧問，退任後又撈到個全國港澳研究會副會長做，而且仲俾包括建制派在內好多人，當正係權威消息人士，不過佢講送中惡法又再顯示燈力，之前103萬人上街後，話單嘢涉及外國勢力介入，擱置有關修訂機會係微乎其微，送中惡法一定會通過，結果未到200萬市民上街，林鄭已話唔將惡法交到立法會！最近佢又話中央一定支持娥特做到任滿，究竟會唔會燈死娥特？呢個要拭目以待。