二十幾年前，一位金融界精英高人同左丁山講過，香港有不少專業精英入咗立法局（現稱立法會），並非一定係好事，因為不少專業精英係functional illiterate（功能文盲），即係話會計師只識會計，工程師只識工程等等，但在立法局做議員，如無哲學思維，歷史知識及瞭解文學到人情世故，搞政治只會搞到一團糟。英國議員部長不少係博雅教育出身。做首相嘅更多是牛津PPE（哲學政治經濟）畢業生，搞政治係圓通一啲，管治殖民地亦有一套理念，每每在重要關節，故意留白，或有時對當地土著隻眼開，隻眼閉，總之收放自如，唔會死牛一邊頸。呢位高人在大學精讀希臘羅馬古典（通識教育要求），視野與其他金融高管不同，零舍係高班啲嘅。
好嘞，現在睇番林鄭月娥及佢嘅司局長，以致行政會議人物，似乎啱晒上述金融高人所講，多是「功能文盲」，否則特首心念一動，用心不用腦，強推「逃犯條例」修訂，點解無人勸止佢呢？或者係特首權力太大，人地忠言逆耳？班權貴去完中聯辦之後，齊撐林鄭，表現出嚟係見高就拜，見中聯辦大人就跪低，好似中咗魔咒咁，公開談話就一定講：「你地唔明，佢地誤解，有外國勢力搞破壞！」講來講去三幅被；不明白、誤解、外國勢力，左丁山睇見，就戥呢班人難過。
講得多，一啲以搵食為優先嘅商人就以為係真理，嘅建制派師奶尤其深信不疑，拿加澳紐護照回港享福嘅人士更加相信，認為香港有人攪亂檔，搞壞香港。在馬場、在中環最常聽見嘅評論就係：「班𡃁仔係受煽動嘅，實係有人攞咗美國佬錢，煽動班細路去搞事。」班細路仔係好激動，易受刺激而要同警察打過。但幕後有邊位可以咁神通廣大，發起全港學生/青年湧上街頭？陳方安生、李柱銘、黎智英、民主黨等等？真係咪講笑，呢班名人對青年人根本係老嘢一代，阿嫲阿爺級數，今時今日之青年點會聽阿公阿婆教訓！煽動？又話美國人「磅水」，完全搵唔出證據，講咗幾年都係指美國NED或索羅斯出錢，講得多都煩。其實香港最有組織最有銀嘅團體係工聯會，要人有人，要錢有錢，建制派試吓叫工聯會吳秋北「煽動」一萬名青年上街撐修例，到立法會聲援工聯會議員吖？左丁山年青時代，曾參與罷課活動，個個搞手窮到燶，嗰陣時就被人鬧：「受到別有用心人士煽動」。眨眼五十年後，估唔到仍然係舊調重彈。