雖然特首林鄭喺強大主流民意壓力下，宣佈暫緩推動「送中」惡法，但藍絲群組「愛港行動」嘅fb噚日下午就突然有網民出post，聲稱收到消息，嚟緊星期六或日會有「支持修例大遊行」，呼籲大家一齊參加。唔少網民對上述消息半信半疑，其中有人話呢個遊行搞得太遲，直斥：「米已成炊！嘥x氣！」亦有人問：「（參加遊行有）幾多錢？」
八方睇過網上暫時發動緊兩個表明支持修例嘅遊行，但兩個都係惡搞性質，唔通有人連惡搞同真正遊行都未識分？其中一個不時惡搞林鄭，叫「Unofficial：林鄭月娥Carrie Lam競選專頁」，聲稱聽日喺灣仔修頓球場，由朝早九點到晚上七點舉辦「支持逃犯條例修例大遊行」，話香港有700萬人，「反對派得兩百萬人遊行，即係話有500萬人撐修例」！
至於另一個喺頁面已寫明「堅持反送中」、名為「丹尼爾。海的兩三事」嘅專頁，就話會喺下周日舉行「支持修訂逃犯條例大遊行」，話當日會由尖沙嘴鐘樓出發步行至政總，指每人屆時將獲派飯盒一個，呼籲大家要：「保林鄭 撐送中 唔好搞佢後面」。唔知會唔會有忠實藍絲響應號召？
政研會月底聲援警隊
不過又唔係所有撐警都係惡搞，好似何君堯喺佢fb貼咗喺6月30日星期日，下午三點到六點，香港政研會會喺金鐘添馬公園搞「撐警隊 反暴力 民間聲援大會」，話要為警隊打氣，又話香港政研會只係籌辦同執行單位，參與者皆為市民喎！不過八方覺得參加者最關心係企三粒鐘收幾多、舉牌、大叫打倒黃絲、狂喊有冇得加錢！
李八方