球壇麻煩友大家都見唔少，以前可能會講加斯居尼、卡斯辛奴、巴洛迪利等，但今時今日肯定要數保羅普巴同尼馬，事關呢兩位頂級球星最近又「搞事」！其中普巴一直被皇家馬德里睇中，星期日佢喺日本出席活動就話自己係時候接受新挑戰，擺明唔將曼聯放係眼內；至於近期是非多多、私生活唔檢點嘅尼馬，就可能會俾巴黎聖日耳門（PSG）掃走。
以為前曼聯領隊摩連奴走咗普巴會乖乖踢波，點知佢同曼聯都係唔爭氣，下屆冇歐聯踢，加上皇馬又向普巴招手，搞到佢心郁郁。有傳皇馬會喺普巴同熱刺中場基斯甸艾歷臣之間二揀一，為免錯過轉會機會，普巴就先發制人。
皇馬畀15億即放人
話說普巴去咗日本出席商業活動，唔只同一班日本相撲手影相，仲喺相撲手組成嘅人牆面前表演射罰球，不過當佢接受訪問就話，係時候去其他地方接受新挑戰：「我效力咗曼聯三年，表現一直好好，我諗係時候接受新挑戰。」
家陣26歲嘅普巴，同曼聯嘅合約去到2021年夏天先完，雖然英媒話曼聯高層好唔滿意普巴咁講，但又唔想賣走普巴，不過相信皇馬只要畀到1.5億鎊（約15億港元），就可以令曼聯放手；西班牙《馬卡報》仲話，皇馬希望七月前就買到普巴，等施丹喺新球季開操就齊章。英國《每日郵報》就幫曼聯盤點咗五大頂替普巴人選，包括阿根廷中場盧施素、法國新星尼當比利、比利時中場泰利文斯、馬德里體育會中場洛迪卡斯簡迪，或者「降呢」買紐卡素新星桑恩朗達夫。
PSG會長頂唔順尼馬
至於另一麻煩球星尼馬，自從兩年前由巴塞隆拿轉會PSG之後，兩年間是非多多，包括被發現養傷嗰陣喺巴西「開P」，最近仲捲入強姦案形象大插水，難怪PSG會長艾卡拉菲受訪時就鬧爆：「球員要比以前更有責任，一定要做得更多更加努力，如果佢哋唔滿意隨時可以走，我唔想再見到球員搞搞震！」睇嚟矛頭直指尼馬，法國傳媒仲話如果收到滿意嘅報價，PSG肯放走尼馬㖭！