夏日求驗客：舒米高再婚老婆係「兔女郎」

616原來係大婚好日，唔只沙治奧拉莫斯同拍拖多年嘅伴侶Pilar Rubio拉埋天窗，原來前曼聯門將舒米高，都揀咗呢日再婚。舒米高已年屆55歲，眾所周知佢個仔、效力李斯特城嘅卡斯柏舒米高都已經32歲，但原來呢位昔日嘅丹麥門神，同生咗卡斯柏嘅前妻Bente喺2013年離婚，結束咗31年嘅婚姻，而佢星期日迎娶嘅新婚妻子Laura，係喺2014年先開始一齊拍拖，但兩年前曾短暫分開，復合後情比金堅，並喺四個月前正式訂婚。Laura比舒米高後生九年，過去曾係成人雜誌《Playboy》嘅模特兒，家陣已成為一位註冊營養師，仲從事埋演藝事業。佢哋喺哥本哈根一間教堂成婚，邀請咗200個賓客蒞臨觀禮，卡斯柏舒米高同前妻Bente都有到場恭賀。