【拆局】
究竟拖字訣及語言偽術能否挽救林鄭月娥的特首命途？科大社會科學部副教授成名認為，雖然200萬港人要求林鄭下台，但相信北京短期內不會換人，「如果咁咪香港人變波士？2003年都拖年幾先炒董建華，這個先係一黨專政做事方式。」
危機較董建華年代嚴重
不過，成名直言今次林鄭月娥面對的危機較當年董建華更為嚴重，單是拖字訣實在是無補於事，認為她最少需要收回暴動定性，以及調查警方過份使用武力問題，「正係因為好多人見到警方用不合理武力，先企出來，有學生真係返屋企後驚到喊，唔明點解警察咁對佢哋，之後會影響佢哋家長、老師，呢度有好多人，咁可唔可以成立一個有公信力嘅調查委員會呢？」
然而，如果最終追究警察，卻又可能引來警隊的不滿，但成名形容，林鄭現時如同處於十字路口，「民意沸騰足以引發政治動盪，其實佢都冇得揀。」
成名又指出，跟當年佔領運動甚至旺角騷亂不同，今次反送中修例，不同民調本身已經反映存在明顯反對民意，而周日遊行後，多個國際媒體如CNN、BBC等，都以頭條作報道，且集中提及香港人擔心失去兩制、自由等，「唔會係同教育界啲校長講兩句就可以化解。」
現時的抗爭運動，有人提出突襲式「游擊佔領」，成名認為可以令傳媒繼續關注事態發展，「再結合受害者勇於向政府問責，唔係要修辭式說法，可能民陣每星期辦一次晚會，唔只係示威，都可以有嬉笑怒罵元素，總之繼續令件事畀傳媒曝光。」