為聯合國兒童基金會籌款嘅慈善足球賽星期日喺史丹福橋舉行，世界明星隊同英格蘭喺法定時間踢成2:2，最後世界明星隊憑互射12碼以3:1擊敗英格蘭，而呢場慈善賽總籌得約700萬鎊善款。英格蘭開賽20分鐘由F2花式足球嘅Jeremy Lynch先開紀錄，38分鐘，Jeremy Lynch梅開二度，英格蘭領先2:0。不過，利物浦名宿加歷查失誤，令已退役嘅牙買加飛人保特有機可乘，喺44分鐘入波幫世界明星隊追成1:2。完場前七分鐘，真人騷《Love Island》主角Kem Cetinay幫世界明星隊追平2:2，雙方要互射12碼決勝，結果世界明星隊互射12碼贏3:1，驚險贏咗呢場慈善賽。派膠嘅加歷查賽後喺twitter講笑咁話：「聯合國兒童基金會英國分會同我講，要畀保特入波以提高收視。」
