特首林鄭月娥面對百萬人上街同北京施壓下，被迫叫停送中惡法交立法會二讀同三讀，成班之前話送中唔過唔得嘅建制派集體炒車，個個扭軚都扭唔切，即時改口話暫緩係好事，結果唔只俾民主派恥笑，連建制支持者都鬧佢哋埋一份！不過有個建制派悍將竟然唔使炒車，呢個就係前特首梁振英！有民主派發現作為鍵盤戰士嘅689，原來一直冇點撐送中惡法同娥特。
有民主派中人同八方講，佢發現由6.9到6.16反送中200百萬人上街，689冇響應北京或者娥特號召，係fb寫吓嘢撐送中惡法，又或批民主派、示威人士，仲係日日數《蘋果》廣告，佢假假哋叫政協副主席，為乜可以唔為送中惡法搖旗吶喊？雖然689避過送中炒車，但呢個民主派懷疑689置身事外，完全唔撐娥特，會否另有所圖？現在娥特個特首位危危乎，唔通689睇實娥特嘅餘下任期？