烏拉圭星期日以4:0大炒大部份時間得10人應戰嘅厄瓜多爾，喺美洲盃旗開得勝。烏拉圭喺C組首輪分組賽對厄瓜多爾，由卡雲尼及蘇亞雷斯兩名球星掛帥，開波六分鐘，烏拉圭即憑盧迪路嘅入波領先1:0。24分鐘，厄瓜多爾嘅荷西昆達路侵犯盧迪路，球證喺視像裁判幫助下以紅牌將佢驅逐。其後，卡雲尼同蘇亞雷斯分別喺33同44分鐘建功，到78分鐘更憑厄國球員擺烏龍，以4:0大勝一場。
同日另一場，獲邀參賽嘅卡塔爾就爆冷喇，喺落後兩球下以2:2逼和巴拉圭。呢場B組賽事，卡塔爾喺四分鐘就失守，巴拉圭由奧斯卡卡度素主射12碼中鵠領先。56分鐘，達列斯干沙利斯遠射得手，巴拉圭領先到2:0。不過，卡塔爾喺68分鐘由艾莫爾斯阿里破網追成1:2，11分鐘後巴拉圭嘅洛迪高羅哈斯擺烏龍，幫卡塔爾追平，最終雙方以2:2打和。
