上星期六喺波蘭舉行嘅世青盃決賽，烏克蘭U20喺開波5分鐘就先失1球下，以3:1反勝南韓U20，首度奪得世青盃冠軍（圖）。
今屆世青盃由兩支同為首度打入決賽嘅球隊爭奪冠軍，其中烏克蘭喺今屆世青盃分組賽起就一場都冇輸過，對手南韓都唔差，淨係喺分組賽首戰僅負葡萄牙U20一球。不過今場波開波僅兩分鐘，金世允喺禁區內俾烏克蘭球員侵犯，球證經視像裁判（VAR）協助下判罰12碼，南韓由李康仁操刀射入，開咗波5分鐘就領先1:0。
落後嘅烏克蘭喺34分鐘由蘇比亞夏扳平，半場雙方踢成1:1。到咗52分鐘，蘇比亞夏再建一功，烏克蘭反超前成2:1，薛泰舒維利則喺89分鐘錦上添花，幫烏克蘭以3:1反勝南韓，歷史性奪得世青盃冠軍。
賽後，南韓嘅李康仁獲得表揚賽事最佳球員嘅金球獎，烏克蘭門將盧連就獲得金手套獎。