「我同阿仔講，媽媽純粹唔舒服睇醫生，妹妹喺嗰度住得好開心，所以未返屋企。我知道你好掛住妹妹，但妹妹有少少唔舒服，妹妹冇事就會返嚟。佢哦咗一聲，然後變得好開心。三個月後，我帶哥哥去醫院接妹妹返屋企，情況好似《一個快樂的傳說》劇情。」又到了父親節，林子聰坦言第二度做父親，才讓他首次體會到一家之主的真正意思。
得獎電影《一個快樂的傳說》（Life Is Beautiful），講述一對父子於二戰時期被納粹捉入集中營，父親為隱瞞二人境況，竟欺騙兒子指他們在集中營是玩一個贏取坦克的遊戲……一個滿載幽默的美麗謊言。
前者，是真實的故事；後者，是編造的故事。林子聰無意中將兩個故事相連，產生這樣的啟發：人生快樂不快樂，不是命運決定，而由心態主宰，他更學會為家人充當一棵大樹，隨時提供護蔭。
撰文：涂宛芝 攝影：黃志明
妻子：誕1.9磅嬰 徘徊生死邊緣
今年1月，大家稱呼「肥仔聰」的林子聰，在家照顧着六個月身孕的太太，早已經知道太太第二胎出現「植入性胎盤」問題，有相當危險，肥仔聰自言就是有心理準備，也逃不過驚心一幕。
「突然之間老婆話痛，但當時好早，只係六個幾月，然後佢話感覺要生，我即刻叫救護車，未去到醫院，就已經喺救護車上面生咗。太太之前已經知道胎盤有問題，連隨大量出血，呢個畫面冇辦法唔記得。」事隔半年，肥仔聰依然清楚記得。
肥仔聰用手比劃着，女兒波波出世時，1.9磅重，不夠兩隻手掌大，發了「呀」一聲，他已經不敢再看下去。
「我望住老婆，不過佢已經唔係好清醒，好彩係，當中有好多個好彩，救護員極速將佢送到醫院，又去咗一間最好嘅醫院。七個醫生分別救兩個人，嗰晚我坐喺手術室外面，等咗五個幾鐘。」肥仔聰回憶。
那一夜，太太輸了十包血，是人體三分之二血量。女兒輸了三包，然後被送到深切治療病房。得悉太太脫離危險，肥仔聰才去看女兒波波，當時睡在暖箱的波波，被一班醫生圍着。
「作為爸爸嘅，最無助係醫生話冇人可以幫到佢，𠵱家用好多儀器，同埋好多嘢去幫緊佢，不過要睇佢自己。嗰一刻老婆幾時醒都幫唔到，個女幾時醒或者有冇事，我又幫唔到佢。」肥仔聰甚至想過，如果本來四個人的家只剩下兩個，往後應該怎過。
跳過一切不切實際的亂想，往後的每天，他要到醫院為女兒打氣，因為被儀器包着小小身體，滿身插着喉的波波，心肺功能未完全發展，她要生存下去，第一件要學的是呼吸。
「我冇咩可以做，只可以打開窗口，每日同佢講加油，講吓講吓，佢情況開始好轉，唔使蒙眼，跟住掹走啲喉，一段時間之後，我開始睇到佢個樣，發覺波波都幾似我。」肥仔聰說。
太太休養期間，為免她擔心，肥仔聰一直沒有將波波的健康狀況告訴她。在家等候着媽媽和妹妹的兒子，他也借用了《一個快樂的傳說》橋段，告訴他妹妹在醫院過得很快樂。
女兒：愛的奇蹟 學識家庭行先
那肥仔聰自己呢？壓力原來於不自覺間遞增。
「每晚到11點個胃就會抽筋、好痛、嗰幾個月都係咁，最初唔知咩事，以為自己個胃一向唔好，原來唔係，係一個反射，因為11點就係太太作動時間，就會好緊張。失眠咗幾個月，亦都可以話係冇得瞓，直至有一日，醫生話波波應該冇問題，我就真係可以瞓一覺。」另一方面，他慶幸母女倆大步檻過，同時明白一家人能夠整整齊齊生活，並非必然。
「我𠵱家會放多咗時間喺屋企，同家人相處，因為可能今次係佢哋有事，明天可能係我有事，大家仲見唔見到都未知，所以𠵱家自己冇特別嘢做，會留喺屋企。以前我開工就會好癲，試過喺外地拍劇，八個月冇返過屋企。𠵱家唔同晒，朝早做完嘢，可以的話，下晝就飛返屋企。甚至會取捨，唔可以只顧住搵錢。」經歷令他改變，肥仔聰不再只集中在工作，間中會帶兒子去海洋公園，又會父子樂去買雪糕。
現在，半歲大的波波會分辨其聲音，看見他時又特別有反應，側着頭看着肥爸爸。他說這些都是不能記錄下來的寶貴片段，畢竟，他是波波第一個認識的家人。
「波波𠵱家11磅重，我覺得係奇蹟，出院時只有5.2磅，到𠵱家差不多一倍有多，呢兩個月增長尤其快，𠵱家抱佢抱得耐，仲會有啲攰。」肥仔聰笑說。
父親：以身作則 家人最強後盾
身為爸爸，肥仔聰也想起自己爸爸的經歷。回想太太誕下完全不夠秤的女兒波波那天，肥仔聰在醫院哭了一場，之後第一個通知的，就是其爸爸。
「因為媽媽當年都係好多病痛，好早已經離開我哋，其實爸爸當時都承受過呢啲嘢，佢當年比我仲後生，我今年四十幾歲，爸爸三十幾歲時，已經面對緊呢啲問題，所以佢好明白我嗰刻嘅感受，佢比我更傷心。我記得佢當時叫我最緊要定，因為只有我可以行得走得，要負責做好多嘢，唔可以俾自己時間傷心。」肥仔聰說，父親事後更是有感而發，因為媽媽患病時間頗長，父親一直悉心照顧，他傷心的是，為何兒子也遇到同樣經歷。
這半年來，肥仔聰逐漸體會到何謂一家之主。
「中國人社會，男人都係比較內斂，成日都話男人負責做事，我諗做事嘅意思，就係屋企人出去衝鋒陷陣，或者嘗試其他嘢，都冇問題，做爸爸嘅，永遠係負責做back up，總之有爸爸，大家可以放心去過自己嘅日子同人生。」
原來快樂，從來都不是傳說，需要的，是現實中的努力實踐！
場地提供：HOTEL VIC
