洪永城女友梁諾妍有42吋長腿，以前是模特兒，現在是健身中心老闆兼教練，但她仍喜歡演藝工作，訪問中更害羞地談洪永城。問到喜歡洪永城甚麼？她說：「因為佢鍾意睇書。」又欣賞他有膊頭公開戀情。
梁諾妍日前在鰂魚涌接受訪問，輕鬆做出各種高難度動作，原來她忽然由模特兒踏上健身之路，要多得師姐連詩雅，她說：「四年前佢搵我加入夜跑隊，令我開始對跑步產生興趣，於是我去考跑步教練牌，啱啱嗰陣model事業又停咗落嚟，我就一路考多幾個健身牌。」
影響生命
本來梁諾妍沒有打算以健身為職業，純粹無心插柳，「喺ViuTV出現多咗人識，就喺Ig示範健身動作，發現有好多人留言，於是諗諗吓不如同朋友夾份開中心做教練。」不過她仍熱愛演藝工作，因為可以影響生命，「之前做飲食節目，馬來西亞有個患癌嘅觀眾因為做化療好辛苦，佢話見到我好開朗咁食嘢，令佢有番食慾。幫佢捱過咗呢個療程，佢仲因為我去跑馬拉松㖭。」
獲益良多
梁諾妍坦言有興趣拍劇，不過問到有否欣賞洪永城的作品時即一臉害羞，她說：「冇睇呀，有聽過佢拍旅遊節目，有睇《大帥哥》囉！」那麼她最喜歡男友甚麼？她說：「佢好鍾意睇書，教到我好多嘢，我由細到大喺呢方面冇咁有興趣，佢鼓勵咗我睇多啲書。」她亦欣賞男友「有膊頭」，「嗰日我同佢喺車，有記者影相，佢話唔使驚，我哋冇做錯嘢，你係我女友，之後佢公開認咗我哋嘅關係，我有啲意外，但欣賞佢大方。」
洪永城昨日在紅磡出席活動，透露將會與黃翠如到澳洲拍旅遊節目，翠如曾指這是他們最後一次合作，洪永城笑說：「佢真係倒米，如果觀眾鍾意會繼續做，不過度期就難啲，因為大家要拍劇，又有另一半。」他說想過四人同行：「個節目嘅opening可以由阿蕭（蕭正楠）同我女友一齊食飯帶出。」
撰文：翁可人
攝影：沈健程
服裝提供 : Nike
場地提供 : Fitnez Studio