祖雲達斯同車路士兩間球會星期日齊齊喺官網宣佈，確認意大利籍領隊沙利落「車」，取代早前宣佈離任嘅祖雲達斯教練艾基利，成為祖記來季新任主帥。車仔方面透露，沙利離隊係希望返意大利工作，而祖記就宣佈同沙利簽咗三年合約；據英國BBC報道，祖雲達斯為咗60歲嘅沙利，向車路士賠償500萬鎊。
想返意大利陪父母
車路士喺官網話同意終止沙利剩低嘅兩年合約，車路士球會總監瑪蓮娜話：「我哋同沙利喺歐霸決賽後談判，沙利明確表示希望返自己國家工作，仲向我哋解釋原因。」原來沙利係因為認為自己父母年紀大，希望返意大利陪佢哋。會方又感謝沙利同其教練團隊剛季所做嘅工作，以及贏得歐霸盃冠軍，又祝賀沙利喺意甲取得成功。至於祖記方面就補充，沙利從星期日起接管祖記，雙方簽咗3年合約至2022年6月30日，又喺官網提到沙利喺15至18年期間，帶領意甲另一支球會拿玻里，連續3季聯賽攞到82、86同91嘅高分，打破拿玻里喺意甲嘅紀錄等威水史。
恐難駕馭球王C朗
事實上，舊年夏天先由拿玻里轉教車路士嘅沙利，剛季帶領藍戰士開局成績非常唔錯，舊年11月底前12場聯賽保持不敗，12月初更以2:0成為首支打破最終冠軍曼城不敗身嘅球隊；惜之後藍戰士戰績起伏不定，包括曾以0:4同0:6大敗畀般尼茅夫及曼城，英聯盃決賽對曼城不但互射12碼輸波，更爆出門將艾列沙巴拿加拒換離場事件，令沙利領軍能力受質疑，佢亦多次未能控制自己情緒，包括喺英聯賽決賽同歐霸盃決賽前夕發脾氣，所以就算最終帶領車路士奪得英超前四同歐霸盃冠軍，仍難得到車迷歡心。
沙利轉投祖雲達斯會面臨更大挑戰，首先佢執教生涯從未贏過聯賽冠軍，而且祖記陣中雖然有基斯坦奴朗拿度（C朗），但整體陣容老化，可唔可以駕馭C朗都好難講，加上祖記目標除咗衞冕意甲外，更加希望可以染指歐聯冠軍，睇嚟沙利都幾大壓力。
另英媒早前報道，車路士要搵到接班人先肯放走沙利，如今沙利既然離隊，睇嚟前車路士名將、現任打比郡領隊林柏特上「車」都只係時間問題。