阿根廷上星期六踢美洲盃B組首場賽事，雖有美斯領軍，不過後防太弱，阿根廷都係0:2輸畀黑馬哥倫比亞。
美斯今場喺66分鐘頭槌攻門斜出，錯失機會開紀錄後，哥倫比亞五分鐘後就由後備上陣嘅前鋒羅渣馬天尼斯破網，領先1:0。完場前四分鐘，同樣係後備落場嘅杜雲沙柏達，接應謝法臣拿馬傳送，門前鏟射得手，哥倫比亞就咁贈阿根廷兩蛋。今場波係阿根廷喺1997年之後，第一次分組賽首場輸波，亦都係2007年決賽輸畀巴西後，首次喺美洲盃法定時間輸波。
下星期就滿32歲嘅美斯，越嚟越少時間爭取佢個人國際大賽首冠，佢惟有期望一班隊友吸取教訓︰「我哋冇時間去抱怨，一定要向前看，抬起頭繼續努力。哥倫比亞控球做得好出色，不過未有創造明顯機會，當我哋踢出今場最好嘅一段時，佢哋就射入一球靚波，我哋會將今次當做教訓，只要下場擊敗巴拉圭，我哋就返到一個舒適嘅位置。」
