天時暑熱，連續兩個星期上街都咪話唔攰，之不過始終關乎香港未來發展，到底大家想香港繼續保持一國兩制定淪為一個內地省市？相信市民自有抉擇。八方相信噚日上街嘅市民，唔少都係俾特首林鄭月娥死不悔改嘅態度激親，對搞出《逃犯條例》修例爭議惹嚟社會撕裂仲要一句道歉都冇，而前日喺103萬人上街及市民包圍立法會後首度見記者，只係多謝建制派嘅佢處處挑釁在場傳媒，但新聞處其後刊登特首辦發出嘅林鄭記者會稿件，竟然刪去呢啲挑釁語句，乜佢哋都覺得堂堂特首咁嘅態度難登大雅之堂？
可能由於中外傳媒太多，前日主持呢個3點記者會嘅新聞官最初要求每個記者問兩條問題，之後縮至一條，點知未到新聞官開腔，向來好鍾意爭辯嘅林鄭自己嚟料，喝罵提問多過兩條問題嘅記者，「既然有個遊戲規則話最多兩條（問題），但喝極你都要（問）第三條，就唔係尊重遊戲規則」，惹嚟全場譁然，之後林鄭對記者一直好有火氣。
網民：喝極你都要搞送中
但係特首辦前晚9點44分透過新聞處發出林鄭見傳媒答問內容文本時，竟然冇晒喝罵記者嗰句；特首辦解釋，新聞稿內容唔係逐字記錄，所以未必包括同記者會主題冇直接關係嘅內容，指新聞稿附有短片，可以重溫成個記者會。但相信唔少記者都覺得，林鄭挑釁記者幾乎係記者會重要主題，要刪都唔刪呢句啦。有網民就諷刺林鄭：「你自己咪又係喝極都唔×聽！」、「喝極你唔好搞送中，你係都要搞啦」。
李八方