時捷集團有限公司主席、仁濟醫院前主席嚴玉麟的30歲女兒嚴紀雯（Carmen）嫁家族經營建材生意的Jeffrey，昨日於灣仔君悅酒店筵開45席，宴請親友。
感動忍住唔喊
昨日黃昏5時許，大會安排一對新人與富二代姊妹團、包括陀B的何超盈、陳雪鈴、石佩藍及伴娘文詠珊（JM）等拍照，Carmen與老公更連咀兩次，溫馨甜蜜。Carmen說：「好開心成為蔡太，好幸福！」問到與老公是否睡不着？她說：「我哋傾傾吓偈都瞓着咗。」談到造人計劃，她表示：「媽咪之前都有催，因為哥哥生三個，我盡力啦，不過要等埋度蜜月先。」更謂成日摸超盈巨肚沾旺氣。對於媽咪給予女婿200分，Carmen笑說：「我畀400分，唔係咁高分我都唔會嫁畀佢。註冊時老公講誓詞，我感動到想喊，不過見佢咁開心我就忍住，佢乜都以我為先，就連老爺奶奶都好好，令我多咗個家。」
超盈長期好攰
擔任姊妹的超盈大讚Carmen是好老婆：「Carmen今日照顧得我好好，仲特別為我訂做條大碼裙，嗰陣都預咗我已經7個月。第一次陀B真係幾辛苦，長期都好攰。」見她挺着巨肚，問到重了多少？超盈說：「醫生話正常，只係比平常BB大咗兩周，媽咪就緊張啲，成日幫我量血壓，本身預產期係9月，𠵱家可能8月尾，會喺香港開刀生。」談到送5億元別墅做嫁妝，超盈說：「嗰度係我新婚用，但我乜都會畀晒BB，媽咪就好迷信，話𠵱家唔可以裝修，要等生完先。」談到BB改名字，超盈表示未想好，但Carmen有幫忙改。
採訪︰羅慧敏
攝影︰葉君海