近日英國傳媒狂幫林柏特造勢，睇嚟佢返車路士任教幾成定局，尤其另一邊廂沙利亦傳同祖雲達斯已經傾掂數，但前提就係要等林伯搞掂，祖記先可以官宣。林伯前隊友杜奧巴近日返史丹福橋出席慈善活動，已放風話覺得林伯係適合人選，但原來英國《太陽報》話，杜奧巴到時都會同林伯一齊返車仔，出任呢位好兄弟嘅教練團成員其中一員，而且仲傳馬基列尼都有機一齊加入佢哋，整番個車仔三巨頭，加埋車路士個綽號係「藍戰士」，搞到我求大俠突然諗番起80年代首本名曲《豈有此理》嘅本地樂隊Blue Jeans，即係「豹哥」單立文嘅前樂隊；呢隊樂隊首張唱片就叫《藍戰士》，封面就係佢哋三個長毛好威咁企喺度。
林伯唔吼泰利蘇拿
講番正經嘢先，英媒早前咪影到林柏特同杜奧巴喺倫敦會面，原來就係搵佢傾回巢，會畀個前鋒教練佢做。據講林伯就係睇中佢5年前喺2人「恩師」摩連奴第二度上「車」嗰陣，曾經被邀回巢踢波，但實質就係喺更衣室做指導角色，向迪亞高哥斯達等後輩傳授射門心得，所以林伯做生不如做熟，就留前鋒教練呢份工畀杜奧巴。另外，啱啱辭去比甲球會奧伊本教練職位嘅馬基列尼，據聞都同林伯接觸，而且林伯就係睇中對方有過兩次一隊領軍經驗，又做過史雲斯助教，所以覺得對方一定幫到手。
賠4,000萬畀打比郡
至於守門員教練，林伯想搵踢過曼城同紐卡素嘅前愛爾蘭國門基雲，因前隊友施治雖應承掛靴後回巢，但就俾油王阿巴莫域治請做體育總監。但林伯就冇打算勸家陣係阿士東維拉做助教嘅泰利過檔，亦冇諗住挽留家陣出任沙利助手嘅另一前隊友兼前輩蘇拿。英國《天空體育》就話車仔今次向打比郡挖走林伯，要畀呢支英冠球隊400萬鎊（約4,000萬港元）賠償。