厄瓜多爾上周五喺世青盃季軍戰，加時後以1:0擊敗意大利，取得隊史上喺世青盃嘅最佳成績。兩隊今仗部署好大分別，比較喺準決賽嘅陣容，厄瓜多爾今仗只係做咗一個調動，相反意大利收起咗六名球員。
兩隊喺上半場互交白卷後，厄瓜多爾喺下半場開始主導比賽，但兩隊喺法定時間都未分勝負。意大利喺加時半場5分鐘博到12碼，但厄瓜多爾門將摩西斯拉美雷斯飛身撲出馬高奧利華利嘅射門。踢到去104分鐘，今仗唯一入球終於出現。較早前主射12碼宴客嘅馬高奧利華利喺防守自由球時犯錯，喺自己禁區頂頭槌解圍變跣後，造就厄瓜多爾後衞文拿喺遠柱第一時間撞射入網，幫球隊射入奠勝球仲拎埋季軍。