訪問前，我預料這是個爸爸們為子女放棄漫畫夢的悲壯故事，事實相反。有人辭去漫畫工作找朝九晚五正職，之後發現「子女令我珍惜畫畫時間，畫嘢終於變番件有趣事。」也有本來意志消沉的廣告插畫師「畫多咗嘢，因為想畫個女。」追夢未必要犧牲，子女未必是負擔，反而是動力。
一班漫畫家圍埋，不是討論漫畫，「你就生第二個喇喎？」「你有冇諗住生多個？」「生多個好呀！」那份熱情不只在對話中看到，在漫畫中都感受到。
剛出版的漫畫《童年同渡》，作者是八位爸爸漫畫家包括劉燦均（Martin）、吳俊軒、Jackson Ng、張君豪、湛紀恆、Toby Yeung、白水、阿柱。咦？八位？第九位爸爸就是策劃這漫畫的編輯單戈，也是漫畫業內人，之前推出過《童年同閱》、《童年同樂》、《童年同學》，單戈：「計埋今次，同28個漫畫家合作過，今次出《童年同渡》都係因為自己有咗個女，你睇朋友facebook就會特別留意佢哋仔女嘅開心事，咁見到君豪都放好多囡囡嘅相，有幾位漫畫家都有仔女喎，咁不如集合佢哋，用爸爸漫畫家呢個主題出本漫畫啦！香港應該係首次有呢個題材嘅綜合漫畫。」
爸爸當然忙，又要畫漫畫又要工作，所以今次訪問只有四位漫畫家及策劃人現身，他們都有同一個出書理由，「想做一本書，等個仔大個睇到，留個回憶，可能佢會諗，原來爸爸十幾年前係咁諗嘢。」創作了《是但哥》的阿柱說在香港出漫畫書當然不是為賺錢，單戈搭嘴：「唔蝕都偷笑。」阿柱和Toby本身開設一間吉祥物品牌策略公司，也會製作board game，是業餘漫畫家，阿柱有個3歲囝囝，「個仔出世後就開始畫《是但哥》，初生BB成日醒，夜晚冇得瞓就畫漫畫，佢一瞓着我就出廳畫。我成日覺得個仔畀到luck我，佢出現就係畀咗個人生轉捩點我。」
「為佢放棄漫畫，但重拾畫漫畫興趣。」
當興趣變成工作，工作變成習慣，其實好悲哀，但很多人不知不覺踏上這條路。「三年前，生女之前都係收稿幫人做漫畫背景，都多稿做嘅，但唔穩定。」太太懷孕，張君豪多一個責任，「於是放棄漫畫，出嚟搵份正職，喺庇護工場做訓練幹事，完全同畫嘢無關，貪佢返一至五朝九晚五夠穩定，個個月有糧出，剩返啲時間就用嚟畫嘢同埋畀個女。」當大家以為這個爸爸要為現實低頭放棄漫畫夢時，「咁樣反而促使我自己出嚟畫，而家有正職，畫嘢終於變番做興趣，以前做漫畫做到好攰，收工後唔會想揸起支筆，會去打機、飲嘢嘥時間。而家因為要返工要湊女，谷埋畫嘢啲火就落晒去畫嘢嘅時間，每次畫嘢都開心。」
《童年同渡》是Toby參與創作的第一本實體書，其實他早於幾年前已經開了一個page「爸爸的美好時光」分享漫畫，現在有一個6歲仔一個4歲女，「自己鍾意畫嘢，於是決定將同仔女相處嘅嘢畫低，喺page發佈。自己畫畫唔算靚，呢方面發展係零，係爸爸呢個身份令自己的起心肝做呢件事。」仔女做題材，令他們關係更親密，「平時放工返到屋企就問今日佢哋點呀？哦哦哦。但而家每日返去都會問太太佢哋今日發生過啲乜？更加會記住點滴，咀嚼一啲好快過咗嘅畫面，就算出唔到書，呢個都係好好經歷。」
「畫多咗好多畫，因為想畫個女。」
Martin正職是廣告公司插畫師，閒時有畫政治漫畫，「我可以同你講，生咗個女後我重生咗。」這麼嚴重？「係咁嚴重，生女前有一排好消沉，覺得工作悶，搞過生意又失敗收場，幾唔開心。就喺嗰陣，老婆有日WhatsApp我話有意外驚喜，不過可能會加重我負擔同壓力，知道嗰陣好興奮，到佢出世，我直情好似重生一樣！」但工作還是照樣的悶？「而家唔覺得悶，有糧出就OK，返工開心咗，最緊要有糧出，放工返去湊女。」Martin以前成日約朋友行山、寫生，現在放棄了。「因為我更enjoy同阿女一齊，好小事都會令我叮一聲好驚喜。同埋少咗空閒時間，但反而畫多咗畫，因為成日想畫個女，所以單戈一話有呢本書，我就一口答應，因為本身都畫咗好多阿女嘅畫，我係最快交齊稿嗰個。」更開心的是，8月中Martin將會多一個仔或女，「而家畫畫，95%畫個女，第時第二個出世分一半畀佢啦！」父愛有幾偉大？偉大到感染力勁過流感。訪問完吹水，聽到我未有仔女，幾位漫畫家說：「生啦！真係開心好多，得着一定比犧牲多。」表情像保險經紀，不過他們沒佣收。
採訪：陳孝義
攝影：徐振國