公務員Angus的司法覆核之路始於2014年，當年他與伴侶史葛在新西蘭註冊，翌年在冰島行禮。Angus是公務員、史葛是機師，本身工作已分別提供醫療同牙醫福利，合併報稅也不會令二人少交稅，這場官司，堪稱原則之戰，Angus解釋：「我哋覺得要喺有能力做嘅時候，就要去做，我冇理由等到史葛病咗，入咗醫院、瞓喺病床時，我真係需要呢個醫療（福利）嘅時候，我要照顧佢，我唔會再有時間精力，去做一個咁長嘅司法覆核過程。」
喜聞判詞重視人權
Angus爭取公務員的同性配偶，可獲醫療等福利、兩人可以合併報稅，在原訟庭打贏福利一項、輸了報稅；其後與政府雙方均決定上訴，在上訴庭內兩項皆輸。史葛坦言，在上訴庭大敗時非常失望、感覺跌落谷底，但堅信個案有很強的理據，短時間內就決定打上終院。
終審法院頒佈的判詞長達35頁紙，Angus說，最安慰是判詞重視人權、保護性小眾，令政府不可濫用「保障異性婚姻」理由，合理化同性伴侶所受的不公待遇，「好似我哋個案咁樣，你唔畀同性伴侶福利，你唔會令到兩個異性嘅人想結婚，佢（異性戀者）唔會同你講，我兩個gay friend史葛同Angus攞唔到牙醫福利，所以我哋去結婚啦，呢個完全係唔合理嘅」。
同僚懶理法例不公
判決的另一個重要性，在於影響了17萬的公務員團隊。Angus透露，同僚間對覆核案大多冷漠，訪問當天是判決後兩日，「我收咗一個（同事）電話，少過5個人發過訊息畀我」。提出覆核前，Angus曾去信公務員事務局、平機會申訴，也試過直接跟上司討論，「如果你認為政府有理據，其實冇問題，大家成年人可以討論，但佢哋（上司）直情係唔會有一個態度，佢哋態度就係法官話啱、咁你就係啱，法官話錯你就係錯，我唔係好同意呢個觀點」。
終極勝訴還二人公道，但同志遭遇的種種不公，顯然不會一下子消除，Angus直言：「好多權利我哋（同性配偶）仍然係冇，例如探視權、房屋保障，若然每一個權利都要4、5年司法覆核去爭取，我成日話我到80歲，都未可以好似異性伴侶嘅生活一樣。」他希望個案再敲響警鐘，「佢（政府）係知道，去到法院其實係好大機會輸，咁點解仲要等人去挑戰佢呢？點解唔快快趣趣，去改返晒有歧視成份嘅條例同守則呢？」