男人通常有錢就會身痕，好似「大嚿石」咁有錢，多年嚟身邊女人車輪轉，有啲女人冇名冇份都肯為佢生仔，「紐紋柴」就係其中一個，佢跟咗大嚿石十幾二十年，本來住洋樓養番狗生活無憂，可惜人心不足蛇吞象，最後被大嚿石拋棄。
自從冇咗大靠山，紐紋柴日愁夜愁諗計想重修舊好，由於大嚿石好敬重比自己更有錢嘅「硬老爺」，咁啱硬老爺嘅孫仔同紐紋柴個仔讀同一間學校，有蠶蟲師爺幫紐紋柴諗咗條橋，就係趁湊仔返學，主動埋硬老爺新抱仔身邊，得閒約新抱仔食飯、嘆茶、行街，希望埋到硬老爺身，等佢老人家幫忙做和事佬，成功修復同大嚿石關係，再過上等人嘅揮霍生活。
不過，有資格做硬老爺新抱，又點會係一個普遍女人？挑通眼眉嘅新抱仔輕易就睇穿紐紋柴嗰套，所以好多時都係敷衍了事，基於大家嘅仔女都係同校，一邊要保持表面友好關係，所以紐紋柴約佢十次，新抱仔只係會應約一、兩次，見面時講吓扮靚買衫湊仔經，當然冇幫佢引薦畀老爺，紐紋柴嘅如意算盤打唔響，到𠵱家都未諗到辦法返大嚿石身邊，只能靠回憶回味往日風光，好鬼後悔。
撰文：Jessie
姐匙Tal
我姐匙縱橫歌影視幕後，多年嚟冷眼旁觀，娛樂圈大小事都走唔過我雙眼，歡迎大家嚟剝花生。