幾乎每一次林欣彤「出番嚟」，都會說她又一次「重生」，連她自己也說：「其實我休息完三、四個月出番嚟，我都有啲擔心嘅……」。
因為聲帶問題而停工，去年尾更因此要將九展的音樂會腰斬。林欣彤的聲帶，其實已是第二次出事，作為要靠把聲搵食的歌手，可想而知有多無奈。
今次出番嚟，簽了新公司華納，新人事新作風，立即行動出了新歌《玫瑰式體驗》，「玫瑰係代表玫瑰汽酒，通常玫瑰汽酒係喺喜慶、要慶祝嘅時候飲，我加入咗新公司，有新歌又有新形象，其實係一個新開始！」
舊嘅唔去、新嘅唔嚟，林欣彤說：「我有一段時間休息過，跟住出番嚟又好似成長咗咁，好似每次過完一個難關都會覺得，人生唔會咁快停止，係有ups and downs！」
剪去及腰的長髮，一頭清爽新造型，要關關難過關關過的，何止林欣彤一個，此時此刻，這一句，更加擲地有聲。
撰文：文嘉龍
攝影：沈健程
我都會企得番起身
由大台親生女變成王祖藍公司旗下藝人，再到今次簽約國際公司華納，林欣彤說三次經歷都好大分別，「我第一次嘅公司就係TVB嘅management加英皇嘅唱片，完咗之後我都係冇加入唱片公司，就咁去咗祖藍嗰度，跟住半獨立形式嘅歌手，嗰時會做得比𠵱家辛苦，因為好多嘢要自己一個去孭、自己一個去諗，但係嗰時祖藍老闆都好錫我，雖然佢冇話有一個唱片部，但係佢都盡晒佢嘅能力，譬如畀資源我出歌去拍MV，去諗點樣宣傳，佢亦都畀咗好多音樂以外嘅嘢我去做，譬如係舞台劇啦，拍劇集《老表》啦……但係我最想都係專注番喺我嘅音樂同埋出歌，真係做番一個歌手嘅嘢，咁好似入番一間唱片公司先係最應該喎！」
之前孤軍作戰？「都有人幫嘅，但可能未必係我想嗰個範疇囉，我覺得之前已經好努力㗎喇，亦都有啲成績嘅，譬如《忍》呢一首歌好多人鍾意，咁我覺得都好感激！」
林欣彤說，對大台始終懷感激之心，要不是當年的《超級巨聲》，她根本不會入行做到歌星。不過每次事業起飛之時，聲帶又總會出問題，像去年尾就連音樂會都要臨陣腰斬。
「啱啱嗰個難關我都好難過，有成幾個月出唔到聲，一出聲就好痛，其實唔止聲帶，係身體都有痛楚，我諗嗰時壓力太大喇，又唔係好識處理，但係𠵱家過咗喇，都會覺得有佢嘅好，譬如好似我call off（取消）咗演唱會，我做唔到喇，但到我出番嚟喺Alfred（許廷鏗）個騷度升番出嚟做嘉賓，大家嗰個歡呼聲真係好似等咗好耐，好welcome我返嚟，如果冇嗰一個難關，佢哋（fans）又未必會有嗰個期待！」
整整幾個月出唔到聲，加上胃酸倒流與及身體不同的痛症，林欣彤試過以針灸治療，「針到個肚有成三十幾支針呀！」現在情況總算康復，她說：「我𠵱家靠做運動囉！」
她覺得聲帶出問題的源頭是來自壓力，「我曾經好辛苦好唔舒服，而我再喺大家面前企番起身，點樣睇住我由我嘅困難度行番出嚟，而唔係永遠只係睇到好嗰一面，我會show我軟弱嘅一面畀大家睇，即係你哋有嘅軟弱我都有㗎，但係我都會企得番起身，咁我得，你哋都得囉，我希望係有呢一個效果囉！」
喺我唔可愛嘅時候愛我
覺唔覺得自己好黑仔？「我又唔覺得我好黑仔，我反而覺得我好幸運，因為我喺病得好辛苦好唔舒服嘅時候，身邊總會有人真係好錫我囉，例如我屋企人啦，我身邊嘅朋友啦，全部都好supportive，全部都好care我！其實呢啲嘢反而喺低谷嘅時候先收到，你喺高地嘅時候，收到嘅係大家嘅祝福啦、大家嘅開心啦，但當我好需要人哋嘅幫助或者喺好低谷嘅時候，我見到嘅係大家嘅關心啦、大家嘅愛，即係喺我唔可愛嘅時候愛我，我覺得嗰種愛係好實在嘅！」
其實為乜壓力咁大？「我諗係我自己畀我自己嘅壓力都大嘅，又或者我𠵱家唔會點諗，點解會咁差點解會有病，其實某程度上呢啲嘅苦難係祝福嚟嘅，有病都有好嗰面，例如我練咗把新嘅聲出嚟啦，例如雖然我開唔到演唱會，但令大家更加期待啦，又例如喺我唔舒服嘅時候，我睇到好多人真心咁對我好好，我感受到，其實呢啲都係病嘅時候嘅好處囉！」
身邊朋友的愛，一定不能不提欣宜同許廷鏗這兩位鐵膽好友，「阿Joyce欣宜畀咗一啲醫生嘅contact我去睇，仲有我媽咪啦，佢成日都唔怕辛苦咁煲好多嘢畀我，我細佬爹哋都係，佢哋會好有耐性咁對住一個唔可以講嘢嘅我啦！」
林欣彤更形容許廷鏗是她生命中的星星。「其實兩次都係Alfred掹番我上去個台嗰度嘅，譬如第一次我唔舒服嘅時候，就係佢話不如你當同我唱一首歌啦，因為嗰時我都仲係冇乜信心可以企番喺個台度，佢咁樣講完我就上咗去個台；而今次我休息完，又係喺佢個紅館演唱會度上番個台，兩次都係因為許廷鏗，我覺得佢係我生命、呢個career入面嘅一粒星星呀，佢係帶住我行㗎！」
娛樂圈人情紙咁薄咩，林欣彤就話最緊要自己交出真心先，「我相信你散發一個乜嘢磁場出嚟，你就會吸到乜嘢，即係如果我要同你比較邊個啲fans多呀，你得到嘅待遇係點呀，我諗我係唔會去計較囉！我其中有一個朋友就係咁樣驚過，就係阿Joyce欣宜，因為我哋係同年新人，嗰時又未識，嗰時嘅報紙就將我哋去比較，好似我哋鬥咁，其實我冇睇嗰啲報道，但佢有睇，佢都好驚，死啦，阿Mag心裏面會唔會咁諗㗎，但我完全冇，到我哋熟咗知道對方根本就冇作過啲比較囉。其實自己個心唔好咁樣去諗，對方就唔會咁諗，自自然然就會有真心朋友㗎喇，即係你交出真心先囉，咁我個人係好容易交出真心嘅！」
唔相信一見鍾情
交心朋友易得，真心情人可能比較難求。林欣彤入行後的情史緋聞，包括有同屬「巨聲幫」的羅孝勇、合作過電影的陳家樂，最近連天堂鳥成員Tyrese都是她的緋聞對象；還有入行前的初戀圈外男友Ben，兩人三離三合更發生過家暴事件，女方最終忍無可忍斬纜。
事過情遷，林欣彤說只會記好不記壞，「每一段感情入面都有開心同唔開心，我就會計開心多啲嘅，我成日都用呢個嚟做比喻，無論感情又好生命又好，都有好多ups and downs，就好似我哋嘅心電圖咁樣係咁上上落落，如果你係平嘅，就等於你冇咗生命囉，所以我覺得無論開心唔開心都係一場經歷，我都感恩遇到每一個人（男朋友），都係成就呢一刻嘅我嘅人，每一個都係。」
感情問題一直最影響情緒？「一定有，咁話明係感情，就係感性㗎啦，而感性有好多時牽連嘅咪就係情緒囉！我都係一個好易開心嘅人，我唔需要對方製造好多浪漫畀我，可能好多小事已經可以令我好心滿意足，譬如可能細心少少，喺我唔舒服嗰時幫我拎一拎個袋呀，又或者係take care吓我，我都唔係好需要人哋製造驚喜畀我嘅人嚟，可能有啲女仔會鍾意禮物，生日又要乜禮物呀，幾時又要送花，呢啲我全部都冇嘅，即係我唔係好注重，長遠嚟講嗰個人點樣對我先係最重要囉！」
依然相信愛情的林欣彤說，現在的擇偶條件「一定要善良」，她說：「我覺得性格係好緊要嘅，我係冇試過一見鍾情一個人，我通常都係感受吓嗰個人係點，同佢傾耐咗覺得佢個人、feel到佢裏面係點，係一個乜人，我先至有可能心動。我係好難一見鍾情，我唔係淨係睇外表，我覺得睇唔穿一個人囉如果齋睇外表嘅話，所以我係要慢慢醞釀嘅！我係偏向日久生情，如果一見鍾情嗰啲可能係天注定嘅緣份啩，我之前嘅感情都係日久生情，係慢慢了解對方而衍生嘅。」
後記：正負能量
今次的新歌《玫瑰式體驗》的確小清新，隨口兩句歌詞「修補一下會獲再生，休息一下有時要等」都夠晒正能量，問林欣彤如果負能量來襲點算？她說：「我𠵱家覺得做運動好幫到，出一身汗啦，又或者同我媽咪去游吓水，又或者同啲朋友踩吓單車，總之運動一場就好好，或者同我啲狗狗spend time都會好減到壓囉！」
吓吓都要逼自己做正能量大使，唔辛苦咩？「每一件事都有好同唔好㗎，係一定，多啲選擇睇好嗰一面囉𠵱家，又唔需要逼自己永遠正能量嘅，有時候畀自己放空吓，有時候畀自己冇表情一吓，其實都係可以嘅，大家都係人。」
怕唔怕再出唔到聲？「如果嗰樣嘢要再嚟，我會安然接受嘅，即係又有嘢要學喇，我會視每一個難關為上天又要你上一堂。」
Touch wood講句，好在面前真係有張木茶几呢！
髮型：Ritz Lam of Hair Corner（中環）
化妝：Cyrus Lee
服裝提供：initialfashion