外界傳聞，許偉堅80年代已月入20萬，但他反駁，「出面亂吹，你咁寫稅局會搵我㗎！」他不諱言買豬肉收入豐厚，但成本亦高，「我付出幾多成本你知唔知？各有前因莫羨人啦！」從助理買手到今天的豬肉王國，許偉堅近年已將買手生意交予長子許志勇負責，肉檔工作則由幼女許穎欣（May）主理。
鏡頭前的許偉堅總是一臉嚴肅，他承認自己於職場及家中皆是話事人，May直指「老竇好惡」，阿勇小時候更因頑劣而被父親扣減車費，放學由柴灣步行返灣仔，「後生仔行吓又唔會點，我冇打佢喎！佢阿媽梗係有話我，但我講嘢全家都要聽！」
曾因眼光差捱罵
阿勇承認跟父親一樣不愛讀書，加上生性貪玩，早於小學暑假便被父親「捉落欄（屠房）」；對年少的阿勇來說，落欄只是跟世叔伯飲飲食食，「返到去飲茶，做一陣嘢又話去食飯，好開心㗎！」
剛做買手時，阿勇經常因眼光不準確購得「無料」豬，「百七斤重嘅，至少有18斤瘦肉，少過呢個標準就叫『無料』，即係返唔到本」。雖然想兒子繼承衣鉢，但許偉堅這嚴父卻沒刻意手把手教導，「佢冇教㗎，靠我自己睇囉！」
愛被街坊讚靚女
屠房乃男人天下，女兒穎欣巾幗不讓鬚眉，中五畢業後到檔口協助跟單等文職工作，最終卻拎起豬肉刀，「嗰陣送貨成日遲，俾酒樓鬧，舖頭唔夠人嘛，咁我咪幫手斬埋一份」。從小被喚「豬肉妹」，May卻從不介意，「咁我係豬肉妹呀，當然我最鍾意街坊叫我靚女」。
雖然時至今日，有大型超市跳過買手，直接由員工到屠房購買活豬，許偉堅並不認為買手及肉檔是夕陽工業，「副食品永遠係必需品，有錢到李嘉誠咁都要食。」