對唔住，我真係咭一聲笑咗出嚟，而且條片loop住睇咗十幾次，睇一次笑一次，睇十次笑十次：有個在金鐘地鐵站當值的警察叔叔，趾高氣揚和仗義人士展開激烈辯論之際，無端白事大叫「唔好搞我後面」，靈敏轉身企圖擒拿「搞手」，結果發現站在四周的全都是部隊兄弟，大家淡淡定定毫無反應，只有其中一位見師叔發出疑似MeToo控訴，不期然流露「乜又嚟」眼神，只差沒有即場翻白眼。古人有云鬼拍後尾枕，西方叫Freudian slip，潛意識堆積的灰塵出其不意隨風飛揚，真相殘酷地浮現，這個凶神惡煞搜無辜青少年身的阿sir，平日不知道做過什麼虧心事，竟然無中生有幻想後庭遭侵襲，精神飽受的折磨可以想像，鞠躬盡瘁為人民服務換來神經兮兮，原本非常值得同情，但那副表情實在太滑稽，加上直腸直肚的圍觀者還關心追問「邊個搞你後面」，涼薄的我只想起全盛期周星馳，試問又點可以唔笑呢？
中意聽鬼古和喜歡睇恐怖片的閒人，難免穿鑿附會，演繹成神秘的超自然情節，萬眾期待的《閃靈》續集不是即將盛大公映嗎，史丹利寇比力克鏡頭裏的陰陽眼小童長大成人變成秀色可餐的伊雲麥哥哥，粉絲正好從現實取材暖暖身。同情心同理心過剩的基民，則禁不住憐香惜玉，擔憂疑神疑鬼哥會不會是慣性性侵受害人，因為屢遭同事郁手郁腳欺凌，親嘴或者不至於，摸屁股如家常便飯，所以才會思覺失調。在此基雲密佈時刻，忽然爆出港島總區高級警司乃當年劉公子猛男寫真主角之一，嘩，呢一件，留待明天再講。