巴西女足周四喺女子世界盃C組第二輪賽事，雖然曾經領先2:0，但最終居然反輸澳洲（黃衫）2:3，亦係24年嚟首次喺女子世盃分組賽輸波。巴西今仗喺上半場27分鐘就由老將瑪達憑12碼先開紀錄，呢球亦係呢位33歲森巴女將歷來喺世盃入嘅第16球，超越男子組嘅朗拿度，同德國男足名將高路斯睇齊。巴西去到38分鐘再由前鋒姬絲汀安妮破門而領先2:0，不過澳洲喺上半場補時階段就追成1:2，換邊後再喺58分鐘扳平。踢到66分鐘，澳洲中場尹艾蒙大腳傳前，巴西後衞蒙妮卡想解圍點知擺咗烏龍，最終澳洲以3:2反勝巴西。禮拜六女足E組上演兩場比賽，分別係荷蘭對喀麥隆同加拿大對新西蘭。