一位老友來電：「我唔係馬迷，你在星期四講『大灣駒』對『美麗傳承』，『美麗傳承』係馬王，好出名，我聽朋友講過好多次，但大灣駒係咩馬呀？未聽過，請你講吓。」哦，易啦，有匹3歲馬叫做「大灣駒」，英文係Blissful Eight，中英文名字全無關係，唔似得「美麗傳承」英文名叫做Beauty Generation。「大灣駒」係團體馬，馬主叫做八面玲瓏團體，呢隻新馬今個馬季初出，跑咗四場，皆大敗，四次加埋輸咗近40多個馬位，已由標準評分52分下降至43分，睇走勢會係另一隻「地上最強」，降落五班不勝，自動退役嗰種。不少馬迷都話特區政府大力推動「大灣區」，偏偏有一隻馬可能故意改名採用大灣駒為名，四次有三次跑第尾，令練馬師大摩面上無光，亦令粵港澳大灣區尷尬也。馬迷在馬場講：「大灣駒咁渣，唔駛睇」，政府官員若不離地，到馬場聽到，都幾刺耳。三千個律師界人士包括好多位前大律師公會主席遊行抗議，將佢地與撐修例人士之法律修養相比，市民心中有數。
其實改馬名，如帶有若干「政治性」，都幾煩，以前有一隻叫做「基本法」，成日都輸到無影，累馬迷大罵「基本法」，真唔好意思。
唔講馬咯，上星期有飯局，過後秘書來電郵話在「利苑」，左丁山MCC（矇查查），當日下午有事往灣仔CC Wu大廈，滿心歡喜，走咗去北海中心利苑，諗住食完飯就行去CC Wu，好方便，點知接待員話冇人訂房，情急之下打電話問外匯G，佢話：「大佬，係IFC利苑呀！」哎，好彩好快截到的士行菲林明道接灣仔北繞道，好快就到。但之後又要搭的士去CC Wu，真係搵時間嚟攪。席間，賓架H問：「唔該你解釋點解咁多人反對逃犯條例？」說來話長，唯有長話短說，講孟晚舟在加拿大被扣押，美國申請引渡，孟女士有的是錢，請咗一班加拿大精英律師上庭辯護，搞足一年，明年一月先至開審，之後又會上訴之類，搞多兩年。現在孟女士居於豪宅，衣着名牌，笑口盈盈，好似enjoy加拿大生活噃，唔駛返深圳上班，冇乜唔好！反觀中國扣押前加拿大外交官康明凱，現在康明凱人在何處，有冇律師代表，幾時上過法庭，目前情況如何？有邊樣消息公開呀？中國司法制度就是如此不透明，法律保障欠奉，法庭要聽黨委書記的話，點到你唔驚。西班牙則將一批台灣疑犯遣返（被引渡）到中國受審，台灣激烈抗議無效（西班牙承認一個中國）。將來香港人可能亦會送中，幾大反對先啦。現在持有加拿大護照嘅人士，平時比較親建制派，一聽到中加司法制度分別，都唔出聲咯！