【周末專題】華懋屯門小欖低密度住宅項目琨崙賣足7年仍未賣完，去年減價一成後，單是今年已賣出20伙。其中一個實用2,327方呎洋房上月收樓，資深驗樓師詹濟南出手，驚見洗手盆櫃底滿佈蜘蛛網，「小強」睡房四圍走，反映洋房吽足多年的後果。屋大問題多，執修清單長達18頁是平時數百呎單位的幾倍，來去水問題亦多，套廁花灑更如火箭般飛脫，工人房整個地面瓷磚近全面空心，15項工種僅1項無扣分，總分僅69分。
記者：陳家雄
琨崙2012年已獲批入伙紙，華懋等到2015年才開賣，首年僅賣出9伙，銷售率佔全盤9.9%，2016年斥資逾億元進行更新工程，包括更換外牆用料等，但去貨龜速。去年政府推空置稅後，樓盤減價逾一成，又延長成交期，今年至今賣出20伙，佔全盤91伙逾20%。
一名港人買家購入一個連裝修傢俬及電器的洋房，實用2,327方呎，另連550方呎平台及195方呎天台，再加1個車位，成交價約3,900萬元，呎價約16,760元。
喉管貼地難排水
買家上月底收樓，由詹sir驗收。由地下客飯廳開始，客廳天花板已發現多處空心，客廁櫃底木板「爛得好緊要」，洗手盆底修口有個大窿。詹sir站上廚房枱面石驗窗，發現枱面石搖晃，反映石與櫃框架未貼實。洗衣機生口位用木板封死，要開關洗手機水掣要割開塊板，毫不貼心。
與廚房相連的工人房擺設木床度身訂做，詹sir試瞓，長度剛好貼實頭和腳，窄得只能像地球般自轉。木床見駁木，是工人度錯所致。工人房廁所地下瓷磚共24塊，僅4至5塊無空心，詹sir說：「成個起晒做過啦，咁細空間唔應該用呢種鋪法，天氣一變就死㗎啦！」更烏龍是接駁假天花板上熱水爐倒汗水的喉管開口完全貼地，水多會倒灌，貼近門邊易令門框發黑發脹。
洋房地下連1及2樓，4房4套分層樓上2層，每層2間套房。內置樓梯欄杆玻璃多花痕，未至崩裂不容易爆。先看左面客房，分體式冷氣裝置與天花板罅隙大細邊，反映天花板不平衡；打開客廁洗手盆櫃門，櫃內滿佈蜘蛛網，詹sir稱：「櫃內用駁木，求其地盤執條柴來駁都仲好啲。個條木用來托起個洗手盤，一般放水就唔會好重，但見到起樓個個好求其。」
多處執漏僅69分
同層另一個房間有昆蟲侍候，記者發現窗簾有1隻姆指般大的蟑螂，詹sir見怪不怪，笑稱：「等我表現一下我嘅百步穿楊」，着令徒弟遞上橡筋，一擊即中，蟑螂斷一隻腳後反肚，「小強係平時用來訓練我嘅眼界！以前我細個屋企賣鹹魚，好鬼多烏蠅，看檔冇嘢做，用橡筋射烏蠅，百步穿楊就係咁練番嚟」。
再上一層，其中一間主人房，套廁面積近100方呎，有浴缸、企缸及雙面盆設計。詹sir扭開浴缸水掣，置於浴缸邊的花灑頭極速飛脫，水花四淺，弄濕鏡頭，詹sir嘆：「唉！做乜咁吞泡呀。」他指水龍頭應鈎實浴缸邊，但沒有鈎實，甚至裝錯鎖鈎。另外，隔籬企缸去水位石材亦罕有地斷開。
全屋多處有批盪空心及地板鬆問題，4個緊接房間的廁所更貼上很多黃色執漏紙仔。詹sir總結指來去水和潔具捧蛋，總分獲69分，一隻蟑螂累單位無法達至「7」字良好水平。他補充指今次單位比起2年前同類型洋房的交樓質素，分數略高8分，主要是油漆略有進步，不過今次單位很多細緻位做得差，例如駁木，反映手工馬虎。
華懋發言人回覆稱非常重視樓宇質素，已責成負責部門跟進，預計執修將於14個工作天內辦妥，屆時會確保業主滿意才完工。同時集團着重環境衞生，已在琨崙公眾地方加強蟲患監測。
