【中環在線】譚仔雲南米線2015年起推出資助員工仔女攻讀大學嘅福利，分店姐姐子女可以申請拎最多5萬蚊幫補學費，今年又有19個員工子女拎到獎學金喇。以「墨演」加一餸米線每碗35蚊計，5萬蚊足夠食1,428碗！譚仔國際行政總裁劉達民話，會積極考慮將計劃推廣至譚仔三哥。
只要喺譚仔分店工作滿三年，而又有子女讀緊全日制大學課程嘅譚仔員工，就可以申請學費補貼。不過仲有一個關卡！子女要先到譚仔分店實習至少72小時，感受吓媽媽或者老竇平日工作辛勞，先可以拎到錢。名額每年20個，每名獲發獎學金金額為每年學費八成，上限5萬蚊。
分店姐姐郭少萍仔仔何桂璋話，一開始以為譚仔樓面都係清一色姐姐，男仔去做覺得有啲怯，但媽媽話原來都有男仔，咁佢就放心晒喇！做過譚仔，兩母子多咗共同話題。譚仔雲南米線總經理許子康話，計劃目的正正就係想促進員工同子女嘅關係。
李華華
mailto:[email protected]