【爆相爆片】現年51歲張家輝同54歲關詠荷（娥姐）於03年結束十多年嘅愛情長跑，喺澳洲註冊結婚，06年生咗囡囡張童，一家三口好幸福。當年家輝同娥姐雖然喺外地成婚，但佢哋都有影浪漫婚照。不過事隔16年，日前讀者王先生透過「爆相爆片」分享，見到家輝夫婦嘅其中一張婚照，竟然被遺棄街頭。
冇人處理
讀者王先生話6月1日下午兩點幾，喺中環皇后大道中中環中心對出，見到家輝同娥姐嘅陳年婚照，連同畫框隨便放喺街上，王先生話：「好奇怪，就咁放喺路邊，另外仲有兩張花畫，旁邊有個黑色垃圾袋，應該係之前用嚟放畫。但大家都係直行直過，又冇人理。」馮仁昭之後去過同一地點，當時已經係黃昏6點幾，家輝同娥姐嘅婚照仍然擺喺路邊，一直冇人處理，而附近就未見有婚紗公司或者畫廊。馮仁昭問過附近大廈嘅保安人員，佢哋就話唔知情。
家輝經理人鍾珍以短訊回覆：「是以前廣告相，不知是否婚紗公司結業。」至於婚照被人丟喺街頭，家輝會唔會唔開心或者追究？鍾珍話：「唔回應了。」