宣萱、白只、「腦細」林日曦和韋羅莎在職場打滾多年，將於下月合演舞台劇《大辭職日》，論盡打工仔苦況。由於宣萱和林日曦氣場太勁，白只表示雖然在劇中有場戲要攬實宣萱，但他不敢，宣萱笑言：「我話心口撞心口都得㗎！」
撰文：嵐山
攝影：沈健程
白只和韋羅莎曾分別獲得香港舞台劇獎最佳男配角及最佳女主角，舞台劇經驗比宣萱和林日曦豐富，但二人都表現得戰戰兢兢，白只說：「我演一個啱啱入公司嘅年輕人，唔係好知發生乜事，有冇激嬲人、條底線喺邊，做創作應該好free，但就要面對好多權力鬥爭。其中一場戲叫我攬實宣萱，嘩！宣萱喎，邊敢呀！幾時可以同老闆give me five，我直頭見唔到呢一日。」在旁的宣萱聽見，即笑笑口說：「我話心口撞心口都得㗎！」
「個個都好驚我」
宣萱雖然是視后，但自言是「新人」，今次與一班年輕人合作，感覺自己都後生了，她說：「佢哋個個都好驚我呀，可能大家睇得電視多，覺得我好惡同好嚴肅，今次角色有少少似Mall姐，但就多咗啲搞笑。」問到如何打破隔膜，宣萱說：「乜都叫佢哋做囉！女演員係要主動啲，遲啲佢哋就會覺得我太癲。」
宣萱在劇中飾演公司高層，提到上一次「辭職」，應該是離開無綫，之後跟古天樂的電影公司簽約，她說：「都唔可以話辭職，係約滿我選擇離開。我畢業就喺TVB，同一間公司做咗18年，都係comfort zone問題，熟悉環境合作慣咗，又做主角，所有嘢都好安穩。離開前幾年，好多人叫我出嚟睇多啲世界，但我好驚，又打消咗個念頭。」但最後宣萱都決定走，開心現在可以試很多不同角色。
跟白只一樣，韋羅莎跟宣萱、林日曦排戲，感覺有點似返工對着老闆，她指林日曦比較可怕，「係有啲驚腦細，大家未好熟，摸索緊。平時同白只合作開就點都得，但唔敢喺腦細同宣萱面前咁癲咁喪，有時唔知從何入手，但啱啱開始綵排，之後就會get to know大家。」
「想有啲新衝擊」
林日曦在商台出身，之後走去創辦毛記電視，近年又不時在其《100毛》創作平台做幕前，曾先後與黎明、姜濤賣咖啡廣告，今次就粉墨登場做舞台劇。他與團隊想了100個辭職理由，問到那一個最有point？他說：「應該係諗起自己都有夢想，每個人都應該有，我當年唔做商台幕後創作，我成日都想辭職。其實最初做商台都係無啦啦裸辭，唔知做乜，辭咗職先嘅，成日做一個地方會覺得好悶，想有啲新衝擊。」
現在做老闆，面對員工辭職會否擔心？林日曦說：「唔驚，因為驚唔到，我間公司啲人都好興辭職，有啲想追求人生，有啲想working holiday，有啲想唞吓，每個人都有唔同原因。」
化妝：Kamen、Julie、Annie
髮型：Keith Wo、Jo、Jaden
服裝提供：Marella